Ermənistanın təxribatları sülh yollarını bağlayır - AÇIQLAMA
Azərbaycanın Xarici İşlər naziri Ceyhun Bayramov, yanvarın 16-da Gürcüstanın Xarici İşlər naziri Maka Boçorişvili ilə Bakıda keçirilən birgə mətbuat konfransında Ermənistanın Azərbaycana qarşı mövqeyinin narahatlıq doğurduğunu bildirib. O, Ermənistan-Azərbaycan postmünaqişə məsələsi və Cənubi Qafqazdakı təhlükəsizlik mühitinin müzakirə olunduğunu vurğulayıb. Bayramov qeyd edib ki, Azərbaycan hərbi güc tətbiq edərək beynəlxalq hüququn tələblərini icra etməyə məcbur qalıb. O, əlavə edib ki, Ermənistanın konstitusiyasında Azərbaycana qarşı ərazi iddiaları hələ də qalmaqdadır, lakin buna baxmayaraq, Azərbaycan sülh müqaviləsi üzərində iş təklif edib.
Milli Məclisin deputatı Ceyhun Məmmədov isə Crossmedia.az-a açıqlamasında bildirib ki, “Bu gün Azərbaycanla Ermənistan arasında sülh prosesinə ən çox mane olan əsas məsələ Ermənistanın Konstitusiyasında Azərbaycana qarşı ərazi iddialarının mövcud olmasıdır. Hazırda məsələnin mahiyyəti ondadır ki, bu məsələ regiona sabitliyin gəlməsinə ciddi şəkildə mane olur və ölkələrin sülh istiqamətində addım atmasına əngəllər yaradır. Ermənistanın Konstitusiyasında Azərbaycana qarşı ərazi iddiaları olduğu halda, hansısa sülh müqaviləsindən danışmaq mümkün deyil. Hər bir ölkənin konstitusiyası onun əsas qanunudur və hər bir dövlət öz konstitusiyasına əməl etməyə çalışır. Belə bir müqavilə bağlandığı halda, Ermənistanda hakimiyyət dəyişərsə, bu məsələ əsas gətirilərək sülhə mane olmağa çalışılacaq və sülh müqaviləsinin legitimliyi şübhə altına alınacaq. Sülh müqaviləsi bağlansa da, tərəflər arasında bu məsələ ətrafında problemlər və qarşıdurmalar davam edəcək”.
Deputat əlavə edib ki: “Ermənistanın indiyə qədər Zəngəzur dəhlizinin açılmasına mane olması, atəşkəsi pozması və beynəlxalq platformalarda Azərbaycana qarşı təxribatlarını davam etdirməsi digər böyük maneələrdəndir. Hazırda həm görüşlərdə, həm beynəlxalq platformalarda, həm də bütün tədbirlərdə Ermənistanın bu təxribatlarının davam etdiyini görürük. Bu səbəbdən, sülhdən danışmaq çətindir. Ermənistan öz yanaşmasını və siyasətini dəyişməli, sülhə doğru addım atmalıdır”.
Ceyhun Məmmədov Qərbin bir sıra ölkələrinin və təşkilatlarının davranışları ilə bağlı məsələlərin də sülh prosesinə mane olduğunu vurğulayıb: “Qərbin Ermənistana haqsız dəstəyi, regiondakı proseslərə müdaxiləsi və bölgədə gərginlik yarada biləcək addımlar atması da sülh prosesinə ciddi maneələr yaradır. Bütün bu amillər sülh quruculuğuna əngəl törədir və özünü açıq şəkildə göstərir”.
Maral Şahverdili
06:58 18.01.2025
Oxunuş sayı: 2219
