Fərqli və gözəl görünmək üçün edilən tatunun zərərləri - AÇIQLAMA
Gözəllik xatirinə edilən müxtəlif üsullardan biri də döymədir. Son zamanlar gənclər arasında döyməyə(tatu) maraq daha da artıb. Fərqli və gözəl görünmək üçün edilən döymənin orqanizm üçün zərərləri haqqında dermatoloq Tünzalə Əzizli Crossmedia.az-a açıqlama verib. Dermatoloq qeyd edib ki, tatu təkcə gözəl görünmək üçün yox, həm də bədəndəki qüsurları örtmək üçün edilir:
"Tatunun qədim tarixi var. Müasir dövrdə tatu dəb halını alıb. Xüsusilə son zamanlarda bədən şəkilləndirmə və digər estetik prosedurlar etdirən xanımlar əməliyyat izlərini gizlətmək üçün tatu etdirirlər. Tatu həm gözəl görünmək həm də bədəndəki qüsurları örtmək üçün edilir".
Dermatoloq tatunun yaratdığı infeksion xəstəlikləri açıqlayıb:
"Keyfiyyətli materiallarla edilən və tatu edən şəxsin nə dərəcədə bilikli olması vacibdir şərtdir. Fəsadlara əsasən rəngli boyaların tətbiqi zamanı müşahidə olunur. Tatu birbaşa dəriyə müdaxilə etdiyi üçün müxtəlif cür infeksiyalara yoluxma qaçınılmaz haldır. Hepatit B , Hepatit C kimi infeksion xəstəliklərin yoluxma riskindən söhbət gedir".
Dermatoloq açıqlamasında tatu edən şəxsin peşəkarlığının vacib olduğunu bildirib:
"Tatu edən şəxsin peşəkarlığı və tatunun hansı dəri təbəqəsinə tətbiq edilməsi də önəmlidir. Epidermis təbəqəsinə edilən dövmələr bir müddət sonra silinir. Bu qat daima yeniləndiyi üçün silinmə tez olur. Amma dərinin derma qatına təbiq edilən boyalı dövmələr uzun müddət, hətta ömür boyu qalır. Dövmə edən şəxsin antiseptika və aseptika qaydalarına əməl etməsi vacibdir. İstər dövmə, istər kosmetoloji prosedurlar, istərsə də cərahiyyədə fərqi yoxdur, hər bir sahədə infeksion xəstəliklərin yoluxma riskini azaltmaq üçün sterilizasiya qaydalarına xüsusi əməl olunmalıdır".
Zeynəb Mustafazadə
09:28 16.01.2025
Oxunuş sayı: 11182
