Ermənistanla ABŞ arasında yeni sənəd imzalanır: işlək olub-olmayacağı gələcək siyasi şərtlərdən asılı olacaq
Ermənistan və ABŞ arasında münasibətlərdə yeni mərhələ başlayır. Vaşinqtonda Ermənistan xarici işlər naziri Ararat Mirzoyan və ABŞ Dövlət katibi Antoni Blinken arasında strateji tərəfdaşlıq sənədinin imzalanması planlaşdırılır. Bu sənəd, iki ölkə arasında siyasi, iqtisadi və təhlükəsizlik sahələrində əməkdaşlığı gücləndirmək məqsədi daşıyır. Məsələyə münasibət bildirən Kreml sözçüsü Dmitri Peskov bildirib ki, ABŞ Cənubi Qafqazda heç vaxt xüsusi sabitləşdirici rol oynamayıb: “Bu fəaliyyətlər kontekstində ABŞ daim yeni ölkələri öz arxasınca çəkməyə çalışır”.
Erməni politoloqu, Erməni Amerika Araşdırmaları Mərkəzinin rəhbəri Suren Sarkisyan isə qeyd edib ki, ABŞ Ermənistana heç bir təhlükəsizlik zəmanəti vermir, hərbi yardım göstərmir, silah-sursat satmır və ya silahla təmin etmir.
Elə isə ABŞ-la strateji tərəfdaşlıq Ermənistanın nəyinə lazımdır? Doğrudanmı, İrəvan Kiyevin getdiyi yola getməkdə maraqlıdır? Axı bu yolun sonu yoxdur...
Bu barədə Crossmedia.az-a danışan Milli Məclisin deputatı Hikmət Babaoğlunun fikrincə, sözügedən sənədin imzalanmasının ABŞ-da Cozef Bayden hakimiyyətinin bitməsinə bir neçə gün qalmış imzalanması diqqət çəkən məqamdır:
“Məsələ ondadır ki, Ermənistan tərəfi bu sazişi tələsik imzalamağa çalışır. Çünki sənədin imzalanmasının gecikməsi onların bu şansı itirməsi ilə nəticələnə bilər. Bu tələskənlik iki əsas səbəblə izah edilir. Birincisi, Ermənistanın baş naziri Nikol Paşinyanın Soros layihələrinə yaxınlığı və Ermənistanı Rusiyaya qarşı mövqe tutmağa vadar etməsi ilə əlaqələndirilir. Bu baxımdan, Bayden administrasiyası Paşinyanı bir növ mükafatlandırır. İkincisi, Brüsseldə ABŞ, Avropa İttifaqı (Aİ) və Ermənistan arasında Soros layihələrinə əsaslanan planların həyata keçirilməsi prosesidir. Bu planların əsas məqsədi Ermənistanı Qərbə daha çox inteqrasiya etməkdir. Lakin bu sazişin uzunmüddətli təsirli olub-olmayacağı ilə bağlı suallar mövcuddur. Çünki ABŞ-da yeni prezidentin hakimiyyətə gəlməsi ilə bu sənədin davamlılığı qeyri-müəyyən ola bilər”.
O, Rusiyanın sözügedən sənədə münasibətinə də diqqət çəkib:
“Moskva daha çox Ermənistanın Aİ ilə artan əlaqələrindən narahatdır, nəinki ABŞ-la imzalanan strateji tərəfdaşlıq sənədindən. Coğrafi yaxınlıq səbəbindən Rusiya Aİ-nin Qafqazdakı təsirini öz maraqlarına təhlükə kimi görür. Beləliklə, Ermənistan və ABŞ arasında strateji tərəfdaşlıq sazişinin Bayden administrasiyasının hakimiyyət müddətinin son günlərində imzalanması tələsik bir addım kimi qiymətləndirilir. Lakin bu sənədin işlək olub-olmayacağı gələcək siyasi şərtlərdən asılı olacaq”.
Fidan Hacızadə
12:26 14.01.2025
Oxunuş sayı: 31736
