Ermənistan və Azərbaycan arasında sülh gözlənilmir
Son zamanlar Ermənistan Cənubi Qafqazda gərginliyi artırmağa davam edir. Ermənistanın daxili siyasi arenasında da mübahisələr dərinləşir. Xüsusilə də Ermənistan hökumət təmsilçilərinin son siyasi bəyanat və çıxışları ciddi müzakirələrə səbəb olur. Ermənistanın müdafiə nazirinin keçmiş müavini Artak Zakaryan da bu məsələlərə sərt reaksiya verərək hökumətin siyasətini tənqid edib.
Zakaryan, baş nazir Nikol Paşinyanın sülhlə bağlı açıqlamalarını reallıqdan uzaq adlandıraraq, bu strategiyanın Ermənistanın maraqlarını satmaqla nəticələnəcəyini bildirib. O, bölgədə Zəngəzur məsələsi ilə bağlı İran və Türkiyə arasında müzakirələrin aparıldığını, lakin Ermənistanın bu proseslərdə demək olar ki, iştirak etmədiyini vurğulayıb.
Ermənistandakı bu müzakirələrə həm də prezident İlham Əliyevin sərt bəyanatları, xəbərdarlığı və Qərbi Azərbaycan məsələsini qətiyyətli şəkildə gündəmdə saxlaması da təsir göstərir.
Hazırkı situasiyada Zəngəzur dəhlizinin açılması nə qədər real görünür? Zəngəzur dəhlizinin açılmasında region dövlətləri nə qədər maraqlıdır? Bu məsələlərin tənzimlənməsi necə mümkün ola bilər?
Mövzu ilə bağlı politoloq Məhəmməd Əsədullazadə Crossmedia.az saytına açıqlama verib:
"Ümumiyyətlə, Ermənistan və Azərbaycan arasında yaxın perspektivdə sülhün əldə olunması gözlənilmir. Türkiyə Zəngəzur dəhlizin açılmasını tələb edir, məsələ ilə əlaqədar İranla da müəyyən danışıqlar aparılır. İranın regionda, eləcə də Yaxın və Orta Şərqdə siyasi mövqeyi gücləndiyi üçün Zəngəzur dəhlizi məsələsində Türkiyə ilə danışıqlara gedərək burada öz maraqlarını da təmin etməyə çalışır. Proseslər məhz bu istiqamətdə davam edir".
Politoloq Zəngəzur dəhlizi ilə bağlı Azərbaycanın mövqeyi və planlarını da açıqlayıb:
"Digər tərəfdən, Azərbaycanın da müəyyən şərtləri mövcuddur ki, Ermənistan onlara əməl etməlidir. Regionda siyasət elə bir müstəvidə inkişaf edir ki, qonşu ölkələrin Azərbaycana münasibətindən asılı olmayaraq, bu proseslərin baş verməsi qaçılmazdır. Çünki siyasi reallıqlar bunu tələb edir. Nə Rusiya, nə də İran bu məsələyə birbaşa müdaxilə edə biləcək mövqedədir. Azərbaycanın bu məsələdə dəstək almayacağı ehtimalı olsa da, həmin ölkələrin proseslərə mane olmaq üçün əsaslı səbəbləri də olmayacaq".
Ayhan Ağarzayev
10:17 11.01.2025
Oxunuş sayı: 4205
