Fuad Musayevin yaradıcılığında rənglərin dili ilə Zəfər və milli yaddaş
Zəfər bir xalqın tarixinə yazılan qürur salnaməsi, milli iradənin, birliyin və əzmkarlığın təntənəsidir. Bu möhtəşəm tarixi hadisə Azərbaycan incəsənətində də özünəməxsus bədii ifadəsini taparaq rəssamların yaradıcılığında yeni mövzu və ideya istiqamətlərinin formalaşmasına təkan vermişdir. Xüsusilə Qarabağın azadlığı, onun tarixi-mədəni irsi, əsrlərin yaddaşını yaşadan memarlıq abidələri və doğma yurd mənzərələri müasir Azərbaycan rəngkarlığının diqqət mərkəzində dayanan başlıca mövzulardandır. Bu mövzulara olduqca həssas baxışıla yanaşan gənc və istedadlı rəssam Fuad Musayevin yaradıcılığı da milli yaddaşın, tarixi irsin və qələbə ruhunun rənglər vasitəsilə ifadəsi baxımından olduqca maraq doğurur.
Eşitmə və nitq məhdudiyyətli olmasına baxmayaraq, incəsənətə, xüsusilə rəssamlığa olan sevgisi, bitib tükənməyən əzmi və daim yaradıcılıq axtarışında olması ilə seçilən Fuad Musayev öz düşüncə və duyğularını rəngarəng əsərləri vasitəsilə ifadə edir. Onun yaradıcılığı bir daha göstərir ki, incəsənət insanın daxili dünyasını ifadə etmək üçün sözlərə və səslərə ehtiyac duymayan, sərhədləri aşan bir ünsiyyət vasitəsidir. Rəssamın əsərlərində rənglər müəllifin Vətənə bağlılığını, tarixi yaddaşa münasibətini və milli-mənəvi dəyərlərə ehtiramını çatdıran bədii ifadə vasitəsidir desək, yanılmarıq.
Fuad Musayevin yaradıcılıq axtarışları müxtəlif mövzuları əhatə etsə də, Azərbaycanın tarixi-mədəni irsinə, Qarabağın füsunkar təbiətinə olan marağı xüsusilə diqqəti cəlb edir. Rəssamın mövzu seçimləri onun milli dəyərlərimizə həssas münasibətindən, tarixi abidələrimizin yaddaşlarda daim yaşadılmasına verdiyi önəmdən xəbər verir.
Fuad Musayevin “Qarabağ” mövzusuna həsr etdiyi əsərlərdə tarixi məkanların təsviri xüsusi yer tutur. Rəssamın “Yuxarı Gövhər Ağa məscidi – Şuşa şəhəri” adlı əsərində XVIII–XIX əsrlərə aid tarixi-memarlıq abidəsi olan məscid təsvir edilir. Şuşanın tarixi siluetinin ayrılmaz hissəsi olan bu memarlıq nümunəsi yalnız dini ibadət məkanı deyil, həm də xalqımızın çoxəsrlik mədəniyyətinin, memarlıq ənənələrinin və milli kimliyinin mühüm göstəricisidir. Rəssamın belə bir abidəyə müraciət etməsi onun mövzu seçimində tarixi yaddaşa və milli irsin qorunmasına verdiyi əhəmiyyəti nümayiş etdirir.
Rəssamın “Cənnət Laçınım” adlı əsəri isə doğma torpağın təbii gözəlliyinə, onun insan yaddaşında yaratdığı mənəvi bağlılığa həsr olunmuşdur. Laçın Azərbaycanın təbiət gözəlliklərini özündə birləşdirən, dağları, meşələri və ecazkar mənzərələri ilə seçilən diyarlarımızdandır. Əsərin adından da duyulduğu kimi, burada rəssamın məqsədi yalnız mənzərə təsviri yaratmaq deyil, həm də doğma yurda bəslənən sevgi və qürur hissini tamaşaçıya çatdırmaqdır.
“Şahbulaq qalası, Ağdam” əsərində isə rəssam diqqətini Azərbaycanın orta əsrlər memarlıq irsinin əhəmiyyətli nümunələrindən birinə yönəldir. XVIII əsrdə Qarabağ xanlığı dövründə inşa edilmiş Şahbulaq qalası bölgənin siyasi və memarlıq tarixinin mühüm səhifələrindən birini təşkil edir. Belə tarixi abidələrin rəngkarlıq əsərlərində əks olunması onların yalnız keçmişin yadigarı kimi deyil, həm də milli-mədəni yaddaşın yaşadıcıları kimi təqdim edilməsinə xidmət edir. Fuad Musayev bu mövzuya müraciət etməklə Ağdamın tarixi simasını, Qarabağın zəngin memarlıq irsini və bu irsin gələcək nəsillərə çatdırılmasının vacibliyini rəssamlıq dili ilə vurğulayır.
Rəssamın diqqət çəkən digər əsərlərindən biri də “Ağoğlan məbədi”dir. Laçın ərazisində yerləşən bu qədim dini-memarlıq abidəsi öz tarixi və memarlıq xüsusiyyətləri ilə bölgənin zəngin mədəni irsinin mühüm nümunələrindəndir. Fuad Musayevin belə abidələrin təsvirinə müraciəti onun yaradıcılığında tarixi məkanlara təsadüfi mövzu kimi yanaşmadığını göstərir. Əksinə, rəssam seçdiyi hər bir memarlıq nümunəsinin arxasında dayanan tarixi, mədəni və mənəvi məzmunu rəngkarlıq vasitəsilə yaşatmağa çalışır.
Rəssamın tarixi-memarlıq irsinə marağını əks etdirən digər bir əsəri isə “Laçın, Həmzə Soltan Sarayı”dır. Laçının tarixi memarlıq nümunələrindən olan Həmzə Soltan Sarayının təsviri vasitəsilə Fuad Musayev bölgənin zəngin keçmişinə, memarlıq ənənələrinə və tarixi yaddaşına diqqət yönəldir. Bu mövzuya müraciət rəssamın Qarabağ və Şərqi Zəngəzurun yalnız təbii gözəlliklərini deyil, həm də əsrlərin sınağından keçərək bu günümüzə gəlib çatan mədəni irs nümunələrini öz tabloları vasitəsilə müasir dövrümüzdə yaşatmaq istəyini nümayiş etdirir. Bu əsərləri birləşdirən əsas cəhət onların mövzu dairəsində Qarabağın tarixi və mədəni kimliyinin dayanmasıdır. Şuşanın memarlıq əzəməti, Laçının təbii gözəlliyi, Ağdamın tarixi yaddaşı və qədim məbədlərin mənəvi yükü rəssamın yaradıcılığında vahid ideya xəttinə çevrilir. Bu xəttin mərkəzində isə Vətənə bağlılıq, milli dəyərlərə ehtiram və tarixi irsin qorunması düşüncəsi dayanır.
Fuad Musayevin yaradıcılığında diqqət çəkən digər mühüm məqam onun daim yeniliyə və bədii axtarışlara açıq olmasıdır. Müxtəlif mövzulara müraciət etməsi, milli-mənəvi dəyərləri müasir düşüncə ilə təsvir etməsi onun yaradıcılığının əsas xüsusiyyətlərindəndir. Rəssam cəmiyyət üçün əhəmiyyət daşıyan mövzulara həssas yanaşır, insanı, tarixi, mədəniyyəti və milli kimliyi sənətinin əsas istiqamətlərindən birinə çevirir.
Fuad Musayev öz yaradıcılıq yolu ilə göstərir ki, incəsənətin dili sərhəd tanımır. Rənglər bəzən sözlərin ifadə edə bilmədiyi duyğuları çatdırır, tarixi yaddaşı canlandırır, Vətən sevgisini görünən obraza çevirir. Fuad Musayev rənglərin dili ilə bizə bir daha xatırladır ki, Vətən yalnız yaşadığımız torpaq deyil, həm də qoruduğumuz tarix, yaşatdığımız mədəniyyət və gələcək nəsillərə ötürdüyümüz milli yaddaşımızdır.
Ziyarət Cabarova-Qəhrəmanova
Sənətşünas, Azərbaycan Dövlət Rəsm Qalereyaslnln böyük elmi işçisi
10:00 08.11.2026
Oxunuş sayı: 44
