Neft bazarında nələr baş verir? - YENİ TƏHLÜKƏ
Neftin qiyməti Yaxın Şərqdən tədarükün bərpasına baxmayaraq, bir barel üçün 100 dollardan yuxarı səviyyədə qalır.
Crossmedia.az xəbər verir ki, “Bloomberg” neftin bahalaşmasının davam etməsinin əsas səbəblərini açıqlayıb.
Nəşrin yazdığına görə, əsas amillərdən biri Yaxın Şərqdə yeni eskalasiya riskinin qalmasıdır. ABŞ və İran arasında razılaşma əldə olunmayıb, Hörmüz boğazında gəmiçiliklə bağlı risklər davam edir. Bu vəziyyət neftin daşınması xərclərini də kəskin artırıb. Bloomberg-in məlumatına görə, Fars körfəzindən Çinə neftdaşıyan tankerin icarə haqqı sutkada rekord 1,2 milyon dollara çatıb.
Digər mühüm amil qlobal neft ehtiyatlarının azalmasıdır. Dünya üzrə ehtiyatların təxminən 4,3 milyard barel olduğu və bunun son beş ilin minimum səviyyəsi olduğu bildirilir. Eyni zamanda, tələbat da artıb.
Yanacaq bazarında, xüsusilə dizel üzrə qıtlıq da qiymətlərə təzyiq göstərir. Yaxın Şərq və Rusiyadakı emal güclərinin bir hissəsinin fəaliyyətində yaranan problemlər digər neftayırma zavodlarını istehsalı yüksək səviyyədə saxlamağa məcbur edir.
Bloomberg qeyd edir ki, bahalı neft özü də inflyasiya təzyiqini artırır. Bu isə investorların nefti inflyasiyadan qorunmaq üçün vasitə kimi görməsinə səbəb olaraq qiymətləri əlavə dəstəkləyir.
Böyük yeddilik (G7) ölkələri və tərəfdaşlarının ehtiyatlardan 100 milyon barelə qədər neft və dizel buraxmaq qərarı da bazarı tam sakitləşdirməyib. Bloomberg-in qiymətləndirməsinə görə, tədarükün bərpasına baxmayaraq, geosiyasi risklər, aşağı ehtiyatlar, yanacaq qıtlığı və yüksək logistika xərcləri neft qiymətlərini yüksək səviyyədə saxlayır.
09:48 05.10.2026
Oxunuş sayı: 35
