20 Sentyabr Dövlət Suverenliyimizin Rəmzi
Azərbaycanın müasir dövlətçilik tarixində elə günlər vardır ki, onların əhəmiyyəti yalnız bir tarixi hadisə ilə məhdudlaşmır, bütöv bir dövrün yekununu və yeni mərhələnin başlanğıcını ifadə edir. 20 sentyabr da məhz belə tarixi günlərdəndir. Bu tarix Azərbaycan Respublikasının dövlət suverenliyinin tam bərpa olunması ilə yanaşı, Xankəndi, Xocalı, Xocavənd və Ağdərə şəhərlərinin ölkənin vahid hüquqi və inzibati məkanına qayıdışını simvolizə edir.
Azərbaycan Respublikası Prezidentinin 19 sentyabr 2024-cü il tarixli Sərəncamı ilə sentyabrın 20-si Dövlət Suverenliyi Günü elan edilmişdir. Həmin tarix, eyni zamanda, Prezidentin 18 sentyabr 2024-cü il tarixli Sərəncamına əsasən Xankəndi, Xocalı, Xocavənd və Ağdərə şəhərləri günü kimi qeyd olunur.
Bu iki əlamətdar günün eyni tarixdə qeyd olunması 20 sentyabrın Azərbaycan dövlətçiliyində daşıdığı xüsusi məzmunu daha aydın ifadə edir. Bir tərəfdən, Azərbaycanın bütün ərazisində dövlət suverenliyinin bərpası təsdiq edilir, digər tərəfdən isə uzun illər işğal və münaqişə ilə əlaqəli olmuş şəhərlərin yeni inkişaf mərhələsi diqqətə çatdırılır.
Azərbaycan xalqının dövlətçilik tarixində ərazi bütövlüyünün və suverenliyin qorunması hər zaman mühüm yer tutub. Müstəqilliyin ilk illərində ölkənin üzləşdiyi siyasi, iqtisadi və hərbi çətinliklər, Ermənistanın hərbi təcavüzü nəticəsində ərazilərimizin işğal olunması və yüz minlərlə insanın doğma yurdlarından didərgin düşməsi xalqımızın qarşısında mürəkkəb vəzifələr yaratmışdı. Buna baxmayaraq, Azərbaycan dövlət müstəqilliyini möhkəmləndirmək, iqtisadi imkanlarını genişləndirmək və müdafiə qabiliyyətini artırmaq istiqamətində ardıcıl siyasət həyata keçirdi.
Sonrakı mərhələdə dövlətçilik institutlarının gücləndirilməsi, iqtisadi potensialın artırılması, ordunun modernləşdirilməsi və Azərbaycanın beynəlxalq mövqelərinin möhkəmləndirilməsi ölkənin qarşısında duran strateji məqsədlərin reallaşdırılması üçün mühüm zəmin formalaşdırdı.
2020-ci ildə baş vermiş 44 günlük Vətən müharibəsi Azərbaycanın ərazi bütövlüyünün bərpası istiqamətində həlledici mərhələ oldu. Müharibənin nəticələri Azərbaycan tarixində yeni reallıqlar yaratdı və işğaldan azad edilmiş ərazilərdə genişmiqyaslı bərpa və quruculuq prosesinin başlanmasına imkan verdi.
Lakin ərazi bütövlüyünün bərpası dövlət suverenliyinin tam təmin edilməsi ilə tamamlanmalı idi. 2023-cü il sentyabrın 19-da Azərbaycanın Qarabağ iqtisadi rayonunda baş vermiş genişmiqyaslı təxribatların qarşısının alınması və konstitusiya quruluşunun bərpa edilməsi məqsədilə lokal xarakterli antiterror tədbirlərinə başlanıldı. Sentyabrın 20-də tədbirlərin başa çatması ilə Azərbaycanın bütün ərazisində dövlət suverenliyinin tam bərpa edilməsi təmin olundu.
Bu hadisə Azərbaycan dövlətçiliyinin inkişafında mühüm mərhələ təşkil etdi. Dövlətin suveren hüquqlarının bütün ərazidə təmin olunması, Konstitusiyanın və qanunların aliliyinin bərqərar edilməsi, vahid hüquqi və inzibati məkanın formalaşdırılması müstəqil dövlətin əsas xüsusiyyətlərindəndir.
20 sentyabrın tarixi əhəmiyyəti yalnız 2023-cü ilin hadisələri ilə məhdudlaşmır. Bu tarix uzun illər ərzində həyata keçirilmiş dövlət siyasətinin, xalqın milli iradəsinin, ordunun gücünün və dövlətçilik əzminin nəticəsi kimi Azərbaycan tarixində xüsusi yer tutur.
Bu tarixi prosesin mühüm rəmzləri sırasında Xankəndi, Xocalı, Xocavənd və Ağdərə şəhərləri xüsusi əhəmiyyət daşıyır. 2023-cü il oktyabrın 15-də Prezident İlham Əliyevin həmin şəhərlərdə Azərbaycan Respublikasının Dövlət Bayrağını ucaltması dövlət suverenliyinin bərpasının mühüm simvolik ifadələrindən biri oldu.
Xankəndi bu gün Azərbaycanın sosial, mədəni və ictimai həyatına yenidən inteqrasiya olunan mühüm şəhərlərdən biridir. Şəhərin müasir tələblər əsasında inkişaf etdirilməsi, infrastrukturunun yenilənməsi və regional potensialının reallaşdırılması istiqamətində tədbirlər həyata keçirilir.
Xocalı Azərbaycan xalqının yaddaşında xüsusi mənəvi və tarixi məna daşıyan şəhərlərimizdəndir. Xocalının dövlət suverenliyinin bərpa olunduğu ərazilər sırasına daxil edilməsi şəhərin tarixində yeni mərhələnin başlanğıcı olmuşdur. Burada həyata keçirilən bərpa və quruculuq işləri, sosial infrastrukturun yaradılması və keçmiş məcburi köçkünlərin doğma yurdlarına qayıdışının təmin edilməsi Xocalının gələcək inkişafının əsas istiqamətlərini təşkil edir.
Xocavənd qədim tarixi, zəngin mədəni irsi və mühüm arxeoloji abidələri ilə seçilən bölgələrimizdəndir. Bu ərazinin Azərbaycanın vahid inzibati və hüquqi məkanına qayıtması onun tarixi-mədəni irsinin qorunması, infrastrukturunun yenidən qurulması və yaşayış məntəqələrinin inkişafı üçün yeni imkanlar yaradıb.
Ağdərə də Qarabağın sosial-iqtisadi inkişafında mühüm potensiala malik ərazilərdən biridir. Burada dövlət idarəçiliyinin bərpası, infrastrukturun yenilənməsi və yaşayış məntəqələrinin inkişaf etdirilməsi regionun gələcək sosial-iqtisadi mənzərəsinin formalaşmasına xidmət edir.
Bu gün Qarabağ və Şərqi Zəngəzurda həyata keçirilən genişmiqyaslı quruculuq işləri 20 sentyabr tarixinin mahiyyətini yalnız keçmişin xatırlanması ilə məhdudlaşdırmır. Yeni yaşayış məntəqələrinin salınması, yolların və nəqliyyat infrastrukturunun qurulması, enerji və su təminatının yaxşılaşdırılması, sosial obyektlərin yaradılması və iqtisadi fəaliyyət üçün şəraitin formalaşdırılması regionun gələcəyə hesablanmış inkişafının əsas istiqamətlərindəndir.
20 sentyabr həm də Azərbaycanın ərazi bütövlüyü və dövlət suverenliyi uğrunda canından keçmiş şəhidlərimizin əziz xatirəsinin ehtiramla yad edildiyi gündür. Onların fədakarlığı, qazilərimizin şücaəti və Azərbaycan Ordusunun göstərdiyi qəhrəmanlıq xalqımızın Zəfər salnaməsinin ayrılmaz hissəsidir.
Bu tarix bizə dövlət müstəqilliyinin, milli həmrəyliyin və suverenliyin nə qədər mühüm dəyərlər olduğunu bir daha xatırladır. Xankəndidə, Xocalıda, Xocavənddə və Ağdərədə dalğalanan Azərbaycan Dövlət Bayrağı isə dövlətimizin ərazi bütövlüyünün və suverenliyinin əyani ifadəsi olmaqla yanaşı, yeni quruculuq mərhələsinin də rəmzinə çevrilib.
20 Sentyabr – Dövlət Suverenliyi Günü və Xankəndi, Xocalı, Xocavənd və Ağdərə şəhərləri günü münasibətilə xalqımızı təbrik edir, Azərbaycanın ərazi bütövlüyü və dövlət suverenliyi uğrunda şəhid olan qəhrəmanlarımızın əziz xatirəsini dərin ehtiramla yad edir, qazilərimizə və Vətənimizin müdafiəsində xidmət göstərmiş hərbçilərimizə minnətdarlığımızı bildiririk.
Çinarə Nəbiyeva
YAP Yasamal rayon “Moskva pr. 67” ünvanı (ADSEA) üzrə ərazi partiya təşkilatının fəal üzvü.
09:40 21.09.2026
Oxunuş sayı: 44
