Norveç Rusiyaya yaxın ərazidə K9 artilleriya sistemləri yerləşdirib
Norveç Rusiyanın sərhədinə yaxın Finnmark bölgəsində Cənubi Koreya istehsalı K9 Vidar özüyeriyən artilleriya sistemlərindən ibarət divizion yaradıb. Dörd K9 sistemi artıq Porsanqmoendə yerləşdirilib və onların atış məsafəsi 40 kilometrdən çoxdur.
Crossmedia.az xəbər verir ki, Norveç Müdafiə Nazirliyinin məlumatına görə, Finnmark briqadasının artilleriya batalyonunun yaradılması çərçivəsində ilk dörd K9 Vidar sistemi artıq bölgəyə çatdırılıb.
Məlumata görə, Norveç 2028-ci il ərzində daha 24 K9 sistemini Finnmark briqadasına təhvil verməyi planlaşdırır. Bununla ölkənin K9 Vidar parkının ümumi sayı 52-yə çatacaq.
Norveç ordusunun yeni artilleriya sistemləri 155 millimetrlik toplarla təchiz olunub və 40 kilometrdən artıq məsafədə hədəfləri vurmaq imkanına malikdir.
Bundan əlavə, Norveç uzunmənzilli dəqiq atəş imkanlarını gücləndirmək üçün Cənubi Koreya istehsalı K239 Chunmoo yaylım atəş sistemlərini də əldə edir. Norveç Silahlı Qüvvələri bu sistemlərlə uzunmənzilli atəş imkanlarını genişləndirməyi planlaşdırır.
Finnmark briqadasının formalaşdırılmasının 2033-cü ilə qədər başa çatdırılması planlaşdırılır. Norveç Müdafiə Qüvvələri bildirir ki, briqadanın gücləndirilməsi ölkənin şimaldan müdafiə imkanlarının artırılmasına yönəlib.
09:44 07.09.2026
Oxunuş sayı: 44
