İsraildə seçki yarışı Netanyahunun gələcəyini təhlükə altına salır
İsraildə oktyabrın 27-nə təyin olunan parlament seçkilərinin əsas sualı ölkənin siyasi kursundan çox Benyamin Netanyahunun hakimiyyətdə qalıb-qalmayacağıdır.
Crossmedia.az xəbər verir ki, Polşa Şərqi Avropa Araşdırmaları Mərkəzi (OSW) bu barədə məlumat yayıb.
İyulun 17-də Knesset özünü buraxmaq barədə qərar qəbul edib və növbədənkənar parlament seçkilərinin keçirilməsi 27 oktyabra təyin olunub.
Netanyahunun siyasi mövqeyi zəifləsə də, o, hələ də baş nazir postuna ən populyar namizəd olaraq qalır. Seçicilərin təxminən 33-35 faizi onun namizədliyini dəstəkləyir.
Bununla belə, nə Netanyahunun rəhbərlik etdiyi sağçı blok, nə də müxalifət hazırda sabit hökumət formalaşdırmaq üçün kifayət qədər mandat toplamaq imkanına malikdir. OSW bunun seçkilərdən sonra yeni siyasi dalana və növbəti seçkilərin keçirilməsi ehtimalına yol aça biləcəyini bildirir.
Analitiklər hesab edirlər ki, belə vəziyyətdə Netanyahu təhlükəsizlik məsələlərindən siyasi mövqeyini möhkəmləndirmək üçün istifadə edə bilər. OSW Qəzzada yeni hərbi əməliyyatların başlanmasını da istisna etmir.
Müxalifət isə böhrandan seçkilərin təxirə salınması üçün istifadə edilə biləcəyindən narahatdır.
OSW-nin qiymətləndirməsinə görə, hətta Netanyahunun istefası İsrail siyasətində köklü dəyişiklik yaratmaya bilər. Ölkənin əsas siyasi qüvvələrinin əksəriyyəti təhlükəsizlik, xarici siyasət və Fələstin məsələlərində oxşar mövqeləri bölüşür.
Bu səbəbdən mümkün hökumət dəyişikliyinin İsrailin strateji kursundan daha çox siyasi üsluba və ayrı-ayrı qərarlara təsir edəcəyi gözlənilir.
10:11 06.09.2026
Oxunuş sayı: 54
