Kiyevdən Rusiyanın hava əlaqələrini iflic etmək planı
Ukrayna Rusiya hava limanları yaxınlığında pilotsuz uçuş aparatlarının fəaliyyətini artıraraq ölkənin Avropa hissəsində mülki aviasiyanın işini ciddi şəkildə məhdudlaşdırmağı planlaşdırır.
Crossmedia.az xəbər verir ki, The Wall Street Journal bu barədə məlumat yayıb.
Nəşrin məlumatına görə, Kiyev müvəqqəti uçuş məhdudiyyətlərini Rusiya aviasiya infrastrukturuna davamlı təzyiqə çevirməyə çalışır. Ukrayna Könüllülər Ordusunun nümayəndəsi Sergey Bratçuk bunun məqsədinin mülki hava nəqliyyatını iflic etmək olduğunu bildirib.
Ukraynalı rəsmilər sərnişin təyyarələrini hədəfə almaq niyyətində olmadıqlarını bildirirlər. Bunun əvəzinə, hava limanlarının yaxınlığında dronların görünməsi zamanı uçuşların və enişlərin müvəqqəti dayandırılmasını nəzərdə tutan “Xalça” planının daha geniş tətbiqi planlaşdırılır.
Osprey Flight Solutions şirkətinin məlumatına görə, avqust ayında Ukraynaya aid təxminən 16 min pilotsuz uçuş aparatı Rusiyanın mülki aviasiya üçün açıq hava məkanına daxil olub. Ekspertlər çoxsaylı dronların fəaliyyəti, hava hücumundan müdafiə sistemlərinin işi və GPS siqnallarının saxtalaşdırılmasının sərnişin təyyarələri üçün riskləri artırdığını bildirirlər.
Bəzi xarici aviaşirkətlər artıq Rusiya istiqamətində uçuşlarını azaldır və ya dəyişdirirlər. EL AL daha əvvəl Təl-Əviv–Moskva reyslərini dayandırıb, Pegasus bir sıra uçuşları ləğv edib, Flydubai isə uçuş cədvəli və marşrutlarında dəyişikliklərə gedib.
Flightradar24-ün məlumatına görə, sentyabrın 1-dən etibarən Rusiya və beynəlxalq aviaşirkətlər sutka ərzində orta hesabla 86 reysi ləğv edirlər.
Osprey Flight Solutions xəbərdarlıq edir ki, vəziyyətin daha da pisləşməsi ciddi aviasiya insidentinə səbəb ola bilər.
17:41 04.09.2026
Oxunuş sayı: 51
