Xarici xəbərlər

ABŞ Gizli Xidməti təhlükəsizlik siyasətlərini illərdir yeniləməyib

ABŞ prezidentlərini qoruyan Gizli Xidmətin bəzi əsas təhlükəsizlik protokollarını uzun illər ərzində yeniləmədiyi üzə çıxıb.

Crossmedia.az xəbər verir ki, ABŞ Hökumət Hesabatlılığı Ofisinin (GAO) hesabatında bu barədə məlumat verilib.

Hesabata görə, Gizli Xidmət ABŞ prezidentini və xaricə səfər edən digər yüksək vəzifəli şəxsləri qorumaq üçün istifadə etdiyi protokolları 1991-ci ildən bəri dəyişməyib.

ABŞ Konqresində aparılan araşdırma zamanı qurumun təhlükəsizlik siyasətlərində zəruri yeniliklər etmədiyi və pilotsuz uçuş aparatları (PUA) kimi müasir təhdidlərə qarşı uzun illər köhnə üsullardan istifadə etdiyi müəyyənləşdirilib.

GAO-nun məlumatına əsasən, 2015-2025-ci illərdə Gizli Xidmətin normal mühafizə fəaliyyətinə təsir edən 83 hadisə araşdırılıb. Bu hadisələrdən yalnız 25-dən sonra mövcud siyasətlərə dəyişiklik edilib.

Hesabatda həmçinin qeyd olunub ki, Gizli Xidmət yeni prosedurların qüvvəyə mindikdən sonra dörd il ərzində nəzərdən keçirilməsini nəzərdə tutan öz daxili qaydasına da əməl etməyib.

Araşdırmada Donald Trampa qarşı 2024-cü ildə baş vermiş sui-qəsd cəhdi və digər təhlükəsizlik insidentləri fonunda qurumun mühafizə siyasətlərini yeniləməməsi də diqqətə çatdırılıb.

Mövzular:

ABŞ Gizli Xidmət ABŞ Hökumət Hesabatlılığı Ofisi 83 hadisə Donald Tramp PUA

🖨 Çap et

11:51 04.09.2026

Oxunuş sayı: 45