Münhendə müdafiə şirkətinin qərargahı hədəfə alındı
Gecə saatlarında Münhendə texnologiya və müdafiə şirkəti “Rohde & Schwarz”ın baş qərargahı qarşısındakı tikinti sahəsinə naməlum şəxslər tərəfindən üç “Molotov kokteyli” atılıb. “Bild”in məlumatına görə, onlardan ikisi alışıb, üçüncüsü isə istehkamçılar tərəfindən zərərsizləşdirilib.
Crossmedia.az xəbər verir ki, “Bild” bu barədə məlumat yayıb.
Şirkətin təhlükəsizlik əməkdaşları tikinti konteynerlərinin yaxınlığında yaranan yanğını söndürüblər. Hadisə nəticəsində xəsarət alan olmayıb və ciddi maddi zərər qeydə alınmayıb.
Bavariya radiosunun (“BR”) məlumatına görə, polis yaxınlıqdakı yanacaqdoldurma məntəqəsində 28 yaşlı qadın və 38 yaşlı kişini saxlayıb. Hər iki şəxsin Bolqarıstan vətəndaşı olduğu bildirilir.
Saxlanılanların üzərində axtarış aparılıb və şəxsi əşyaları götürülüb. Hüquq-mühafizə orqanları hücumun motivlərini və saxlanılan şəxslərin hadisə ilə əlaqəsini araşdırır.
16:47 03.09.2026
Oxunuş sayı: 50
