Toy mərasiminə yaxın ABŞ zərbəsi: 5 nəfər öldü, 68 nəfər yaralandı
ABŞ-nin İranın cənubundakı Küheştək şəhərinə endirdiyi zərbə zamanı toy mərasiminin keçirildiyi yaşayış evinə yaxın əraziyə raket düşməsi nəticəsində 5 nəfər ölüb, 68 nəfər yaralanıb. Ölənlər arasında 4 yaşlı uşaq da var.
Crossmedia.az xəbər verir ki, “The Guardian” bu barədə məlumat yayıb.
Hadisə İranın Hörmüzqan vilayətinin Küheştək şəhərində toy mərasimi keçirilən vaxt baş verib. İran rəsmilərinin məlumatına görə, zərbə nəticəsində əsasən qadın və uşaqlar yaralanıb.
İran ABŞ-ni mülki əhalini hədəfə almaqda ittiham edib və hücumu “müharibə cinayəti” kimi qiymətləndirib.
ABŞ Mərkəzi Komandanlığı (CENTCOM) isə zərbələrin İran İslam İnqilabı Keşikçiləri Korpusuna (SEPAH) məxsus hərbi obyektlərə, o cümlədən hava hücumundan müdafiə sistemləri, radarlar, dəniz obyektləri və rabitə infrastrukturlarına qarşı həyata keçirildiyini bildirib. CENTCOM mülki şəxslərin hədəfə alınmadığını vurğulayıb.
Hadisə yerindən yayılan görüntülərdə yaşayış evinin dağıldığı, pəncərələrin sındığı və əraziyə dağıntıların səpələndiyi görünür. Raketin yaşayış evinə birbaşa, yoxsa yaxınlıqdakı əraziyə düşdüyü və dağıntıların evə çatdığı hələ dəqiq müəyyən edilməyib.
Raketin növü
Hadisə yerindən götürülən qalıqları araşdıran müstəqil silah analitiki Trevor Ball onların ABŞ istehsalı Boeing SLAM-ER raketinə aid ola biləcəyini bildirib. Bununla belə, raketin məhz bu hadisədə istifadə edilməsi ilə bağlı məlumatın müstəqil şəkildə təsdiqlənmədiyi qeyd olunur.
Hadisə ABŞ və İran arasında bir aylıq nisbi sakitlikdən sonra hərbi qarşıdurmanın yenidən kəskinləşdiyi bir vaxtda baş verib.
16:32 02.09.2026
Oxunuş sayı: 48
