Xarici xəbərlər

Rusiyadan Ermənistana yüklərin Azərbaycandan tranziti artır

Rusiya ilə Ermənistan arasında yük daşımalarının həcmi artıb və Rusiya yüklərinin bir hissəsi Azərbaycandan keçməklə Ermənistana göndərilir.

Crossmedia.az xəbər verir ki, bu barədə Rusiya Dəmir Yollarının rəhbəri Oleq Belozerov “Vesti”yə açıqlamasında məlumat verib.

Belozerov bildirib ki, əvvəllər Rusiya ilə Ermənistan arasında yük daşımaları daha qapalı marşrut üzrə həyata keçirilirdisə, hazırda Ermənistana daşımalar üçün əlavə imkanlar yaranıb.

Onun sözlərinə görə, Rusiyadan Azərbaycandan keçməklə Ermənistana böyük həcmdə müxtəlif yüklər göndərilir. Bu yüklər arasında neft məhsulları, taxıl, meşə materialları və metal əsas yer tutur.

Rusiya Dəmir Yollarının rəhbəri qeyd edib ki, Ermənistan tərəfi Rusiyadan neft məhsulları, taxıl və metala maraq göstərir.

Azərbaycandan keçən tranzit marşrut üzrə Rusiya yüklərinin Ermənistana daşınması artıq bir neçə aydır davam edir. Son aylarda bu istiqamətdə taxıl, gübrə, propan, alüminium, kömür və digər yüklərin daşındığı barədə məlumatlar yayılıb.

Mövzular:

Azərbaycan Rusiya Ermənistan tranzit yük daşımaları Rusiya Dəmir Yolları

🖨 Çap et

17:07 01.09.2026

Oxunuş sayı: 50