BDU və Qırğızıstan universitetləri: birgə təhsil proqramları və elmi əməkdaşlıq
Bakı Dövlət Universiteti (BDU) ilə Qırğızıstanın aparıcı ali təhsil müəssisələri arasında təhsil, elm, tədqiqat və beynəlmiləlləşmə sahələrində əməkdaşlıq son illərdə əhəmiyyətli dərəcədə genişlənib.
Crossmedia.az məlumat verir.
Qeyd olunub ki, BDU-nun Qırğızıstan universitetləri ilə əlaqələrinin inkişafında mühüm mərhələ 2024-cü ildə həyata keçirilən qarşılıqlı səfərlər və əməkdaşlıq təşəbbüslərindən sonra başlayıb. 2024-cü il sentyabrın 6-da tarixində Türkiyənin İzmir şəhərində Ege Universiteti, BDU, Özbəkistanın Andijan Dövlət Universiteti və Qırğızıstanın Oş Dövlət Universitetinin birgə təşkilatçılığı ilə “Avrasiyanın biomüxtəlifliyinin qorunması” mövzusunda II beynəlxalq konfrans keçirilib.
Həmin ilin dekabrında BDU nümayəndə heyətinin Bişkekə işgüzar səfəri çərçivəsində Qırğızıstanın aparıcı ali təhsil müəssisələri ilə bir sıra görüşlər keçirilib. Dekabrın 16-da Qırğız Milli Universitetində keçirilən görüşdə beynəlmiləlləşmə və elmi-tədqiqat sahəsində əməkdaşlığın genişləndirilməsi imkanları müzakirə olunub.
2024-cü il dekabrın 17-də BDU nümayəndələri Qırğızıstan-Türkiyə Manas Universitetində olublar. Görüş zamanı ali təhsil müəssisələri arasında beynəlmiləlləşmə, birgə təhsil proqramlarının yaradılması və elmi-tədqiqat əməkdaşlığının inkişaf etdirilməsi məsələləri müzakirə edilib. Eyni tarixdə BDU ilə Qırğızıstanın Yusif Balasaqunlu adına Qırğız Milli Universitetinin rektorları əməkdaşlıq müqaviləsini imzalayıblar.
Həmin il dekabrın 18-də BDU nümayəndə heyəti Qırğızıstan-Rusiya Slavyan Universitetində və İ. Razzakov adına Qırğız Dövlət Texniki Universitetində olub. Görüşlərdə beynəlmiləlləşmə, beynəlxalq əlaqələrin inkişafı, elmi-tədqiqat və digər istiqamətlərdə əməkdaşlığın genişləndirilməsi imkanları müzakirə edilib.
Dekabrın 19-da isə BDU nümayəndə heyəti Qırğızıstan Beynəlxalq Universitetində olub. Görüşdə rəqəmsallaşma, beynəlxalq təhsil proqramları və universitetlərarası əməkdaşlığın inkişaf perspektivləri diqqət mərkəzində olub. Həmin gün BDU ilə Qırğızıstan Beynəlxalq Universiteti arasında əməkdaşlıq haqqında anlaşma memorandumu imzalanıb.
Əməkdaşlığın inkişafı 2025-ci ildə də davam etdirilib. 2025-ci il mayın 19-da BDU rektorunun rəqəmsallaşma və informasiya texnologiyaları üzrə müşaviri Şəbnəm Səfərovanın Bişkekə səfəri çərçivəsində Qırğızıstanın bir sıra nüfuzlu ali təhsil müəssisələrinin rəhbərliyi ilə görüşlər keçirilib və universitetlərarası əməkdaşlığın inkişaf perspektivləri müzakirə olunub.
17:43 31.08.2026
Oxunuş sayı: 42
