9 il torpaq üçün pul yığdı, evini isə plastik tullantılardan tikdi
Kosta-Rikada yaşayan Sindi Mora Abarka öz evi üçün torpaq almaq məqsədilə 9 il ərzində pul toplayıb.
Crossmedia.az xəbər verir ki, “Times of India”nın məlumatına görə, qadın bunun ardından xeyriyyəçi və kommersiya təşkilatlarına müraciət edib və onların dəstəyi ilə təkrar emal olunmuş plastikdən ev tikmək qərarına gəlib.
Lakin torpağı aldıqdan sonra ev tikmək üçün kifayət qədər vəsaiti qalmayıb.
Evin tikintisində təxminən 7 ton emal edilmiş plastikdən istifadə olunub. Əks halda bu tullantılar ya zibilxanalara atılacaqdı, ya da su hövzələrinə düşəcəkdi.
Tikinti üçün plastikdən xüsusi bloklar hazırlanıb. Bloqueplas adlanan texnologiya sayəsində həmin bloklar Lego hissələri kimi bir-birinə birləşdirilir.
Evin divarları plastik bloklardan tikilib, bünövrə, dam örtüyü, su və elektrik xətləri, qapı və pəncərələr isə ənənəvi üsullarla hazırlanıb. Tikinti başa çatdıqdan və ev suvaq və boya ilə tamamlandıqdan sonra bina adi yaşayış evindən demək olar ki, fərqlənməyib.
Layihə plastik tullantıların uzunömürlü və faydalı tikinti materialına çevrilməsinin nümunəsi kimi təqdim olunub. Texnologiyanı hazırlayan şirkət bildirir ki, bu bloklar bəzi zəlzələlərə davamlıdır, istilik və səs izolyasiyası təmin edir, həmçinin hava şəraitindən qorunmağa kömək edir.
03:30 19.08.2026
Oxunuş sayı: 23
