Gənclər və İdman

III “Ulduz Cup” futbol turnirinin iştirakçıları bəlli olub

Avqustun 24-dən 27-dək Qubada 2015-ci il təvəllüdlü futbolçular arasında III “Ulduz Cup” beynəlxalq futbol turniri keçiriləcək. Turnir Gənclər və İdman Nazirliyi, AFFA və “Ulduz” Futbol Akademiyasının təşkilatçılığı ilə baş tutacaq.

Crossmedia.az xəbər verir ki, Quba Olimpiya İdman Kompleksinin stadionunda təşkil olunacaq turnirdə Azərbaycanı “Ulduz” FA, “Zirə” FK, “Sabah” FK, “Neftçi” PFK və “Qarabağ” FK, Özbəkistanı “Paxtakor” FK və “Bunyodkor” FK, Gürcüstanı “Dinamo Tbilisi”, Polşanı “Drukarz” KS, Türkmənistanı “Altın Taç” FK, Qırğızıstanı “Sduşorsi”, Qazaxıstanı isə “Kayrat” komandaları təmsil edəcək. Beləliklə, yarışda ümumilikdə 7 ölkədən 12 komanda mübarizə aparacaq.

Qeyd edək ki, “Ulduz Cup” beynəlxalq futbol turniri artıq üçüncü dəfə keçirilir. İlk turnirdə “Dinamo Minsk” (Belarus) qalib olub. “Ulduz” FA (Azərbaycan) ikinci, “Bunyodkor” (Özbəkistan) isə üçüncü yeri tutublar. Ötən il keçirilən II “Ulduz Cup” turnirində isə “Neftçi” PFK (Azərbaycan) birinci, “Paxtakor” FK (Özbəkistan) ikinci, “Dinamo Tbilisi” (Gürcüstan) üçüncü olublar.

Mövzular:

futbol futbolçu neftçi ulduz oyun turnir təşkilat

🖨 Çap et

22:12 19.08.2026

Oxunuş sayı: 50