Çində meşə yanğınlarını söndürə bilən kentavr robotu təqdim edilib.
Çində insan və heyvan xüsusiyyətlərini birləşdirən kentavr formasında dünyanın ilk robotu nümayiş etdirilib.
Crossmedia.az xəbər verir ki, “Interesting Engineering” nəşrinin məlumatına görə, robot Şanxayda keçirilən 2026 Dünya Süni İntellekt Konfransında təqdim olunub.
Run Robotics şirkətinin hazırladığı hibrid robot daha mürəkkəb maneələri aşmaq və çətin ərazilərdə daha sürətli hərəkət etmək üçün təkər və ayaq sistemlərini birləşdirir.
Süni intellektlə təchiz edilən robot mürəkkəb şəraitdə işləmək üçün hazırlanıb. Bildirilir ki, o, avtonom yoxlamalar apara, yanğınsöndürmə və xilasetmə əməliyyatlarında istifadə oluna bilər.
Hazırlayan şirkət robotların mədən sənayesində, neft yataqlarının yoxlanılmasında və sənaye obyektlərinə texniki xidmətdə də tətbiq edilə biləcəyini açıqlayıb. Tərtibatçıların sözlərinə görə, artıq sənaye şirkətlərindən real sifarişlər alınıb.
Robotun konstruksiyası iki hissədən ibarətdir: dörd təkərli yolsuzluq şassisi və robotlaşdırılmış manipulyatorlarla təchiz olunmuş insanabənzər üst hissə.
Təkərli alt hissə sayəsində robot qeyri-bərabər səthlərdə və təhlükəli ərazilərdə rahat hərəkət edir. Üst hissə isə adi yoxlama robotlarının yerinə yetirə bilmədiyi işləri görmək imkanına malikdir. Bunlara maneələrin aradan qaldırılması, avadanlıqların idarə olunması və təhlükəli şəraitdə xilasetmə qruplarına kömək daxildir.
Robot 120 kiloqramadək yük daşıya və sabit vəziyyətdə 210 kiloqramadək ağırlığa tab gətirə bilir. Platformada müxtəlif manipulyatorlar quraşdırmaq mümkündür; o cümlədən ikiqat və daha çevik robot əlləri.
Tərtibatçılar robotun qavrama sisteminə də xüsusi diqqət yetiriblər. Müxtəlif sensorlar vasitəsilə robot insanları, boru xətlərini, klapanları, manometrləri və digər maneələri müəyyən edə bilir.
Bundan əlavə, robot marşrutları müstəqil şəkildə planlaşdıra və əməliyyat obyektlərinin yerini dəqiq müəyyən edə bilir.
Çində robot dilənçi də diqqət çəkmişdi
Qeyd edək ki, daha əvvəl Çinin Sıçuan əyalətində küçədə insanabənzər robotun dilənməsi görüntüləri yayılmışdı.
Robot diz çökərək əllərini birləşdirir və yoldan keçənlərə baş əyirdi. Onun yanında yerləşdirilən LED lövhədə robotun yenidən enerji yükləmək üçün pulu olmadığı yazılmışdı.
Robot insanlardan elektrik xərclərini ödəməyə kömək etmələrini istəyirdi.
23:50 21.07.2026
Oxunuş sayı: 56
