Fransada isti hava səbəbindən üç nüvə reaktoru dayandırılıb
Fransanın dövlət enerji şirkəti "EDF" güclü istilər və çay sularının temperaturunun artması səbəbindən üç nüvə reaktorunun fəaliyyətini müvəqqəti dayandırıb.
Crossmedia.az xəbər verir ki, "Reuters" bu barədə məlumat yayıb.
Məlumata görə, Golfech, Bugey və Chooz atom elektrik stansiyalarında yerləşən üç reaktor istismarından çıxarılıb. Bundan əlavə, daha yeddi reaktorun istehsal gücünün azaldılması ehtimalı nəzərdən keçirilir.
"EDF" bildirib ki, qərar nüvə təhlükəsizliyi ilə bağlı risklərdən deyil, ekoloji tələblərdən irəli gəlir. Şirkətin izahına görə, atom elektrik stansiyaları soyutma üçün çay suyundan istifadə edir və daha sonra həmin suyu yenidən çaya qaytarır. Suyun temperaturunun normadan yüksək olması isə su ekosistemlərinə zərər verə bilər.
Şirkət qeyd edib ki, görülən tədbirlər ətraf mühitin qorunmasına yönəlib və nüvə obyektlərinin təhlükəsiz istismarı ilə bağlı hər hansı problem qeydə alınmayıb.
16:41 14.07.2026
Oxunuş sayı: 45
