Ankara sammitinin yekun bəyanatının imzalanma ihtimali niyə azdır?
NATO-nun Ankarada keçiriləcək sammitinə hazırlıq prosesi Ukrayna ilə bağlı fikir ayrılıqları səbəbindən çətinləşib.
Crossmedia.az xəbər verir ki, bu barədə ˝Bloomberg˝ nəşri məlumat yayıb.
Məlumata görə, alyans üzvləri sammitin yekun bəyanatı üzərində hələ də ortaq mövqeyə gələ bilmirlər. İtaliya Ukraynaya 2027-ci ilin sonunadək hərbi yardım göstərilməsi ilə bağlı müddəanın daha yumşaq ifadə olunmasını tələb edir. Roma hesab edir ki, konkret vaxt çərçivəsinin göstərilməsi müharibənin başa çatdırılması istiqamətində aparılan danışıqlara mane ola bilər.
Sənəd layihəsində Ukraynaya 2026–2027-ci illərdə ümumilikdə 70 milyard avro həcmində maliyyə dəstəyinin ayrılması nəzərdə tutulur.
Bundan başqa, Şərqi Avropada hərbi yanacaq kəmərlərinin maliyyələşdirilməsi məsələsi də mübahisə mövzusuna çevrilib. Polşa və onun müttəfiqləri bu kəmər şəbəkəsinin şərq istiqamətində genişləndirilməsini istəyirlər. Türkiyə isə eyni maliyyə vəsaitinin öz infrastruktur layihələrinə yönəldilməsində israr edir.
˝Bloomberg˝ qeyd edir ki, məhz bu fikir ayrılıqları sammitin yekun sənədi ilə bağlı razılaşmanın əldə olunmasını ləngidir.
22:14 03.07.2026
Oxunuş sayı: 72
