Şuşa Bəyannaməsinin əhəmiyyətini gələcək nəsillər daha aydın şəkildə görəcək - Deputat
Bu il Azərbaycan-Türkiyə münasibətlərinin ən mühüm siyasi və strateji sənədlərindən biri olan Şuşa Bəyannaməsinin imzalanmasının növbəti ildönümüdür. 2021-ci il iyunun 15-də Azərbaycanın mədəniyyət paytaxtı Şuşada imzalanan bu sənəd iki qardaş ölkə arasında münasibətləri keyfiyyətcə yeni mərhələyə yüksəltməklə yanaşı, regionda yeni təhlükəsizlik və əməkdaşlıq modelinin əsasını qoydu. Şuşa Bəyannaməsi təkcə Azərbaycan və Türkiyənin müttəfiqlik münasibətlərinin hüquqi təsdiqi deyil, həm də türk dünyasının birliyi, regional sabitlik və gələcək inteqrasiya prosesləri baxımından tarixi əhəmiyyət daşıyan sənəd kimi qiymətləndirilir.
Şuşa bəyannaməsinin əhəmiyyəti ilə bağlı Milli Məclisin deputatı, Böyük Azərbaycan Partiyasının sədri Elşad Musayev Crossmedia.az-a açıqlama verib:
“Şuşa Bəyannaməsi Azərbaycan-Türkiyə münasibətlərinin tarixində ən mühüm və strateji sənədlərdən biridir. Bildiyiniz kimi, 2021-ci il iyunun 15-də Azərbaycan Respublikası ilə Türkiyə Respublikası arasında müttəfiqlik münasibətləri haqqında Şuşa Bəyannaməsi imzalanıb. Bu sənəd təkcə iki qardaş ölkə arasında münasibətlərin yeni mərhələyə yüksəlməsini deyil, həm də regionda formalaşan yeni geosiyasi reallıqları əks etdirir. Bəyannamədə siyasi, iqtisadi, enerji, nəqliyyat, mədəniyyət və hərbi sahələr də daxil olmaqla müxtəlif istiqamətlər üzrə əməkdaşlığın daha da genişləndirilməsi nəzərdə tutulur. Sənədin ən mühüm məqamlarından biri təhlükəsizlik və müdafiə sahəsində əməkdaşlıqdır. Burada tərəflərdən birinin müstəqilliyi, suverenliyi və ya ərazi bütövlüyü təhdid altına düşərsə, qarşılıqlı dəstək göstərilməsi ilə bağlı öhdəliklər öz əksini tapıb. Bu baxımdan Şuşa Bəyannaməsi Azərbaycan-Türkiyə müttəfiqliyini daha yüksək səviyyəyə qaldıran tarixi sənəd hesab oluna bilər”.
Deputat əlavə edib ki, 44 günlük Vətən müharibəsində Azərbaycanın qazandığı Zəfərdən sonra bölgədə yeni reallıqlar formalaşdı: “Həmin reallıqların təsdiqi və möhkəmləndirilməsi baxımından Şuşa Bəyannaməsi xüsusi əhəmiyyət daşıyır. Eyni zamanda bu sənəd yalnız Azərbaycan və Türkiyə üçün deyil, bütövlükdə türk dünyası üçün yeni imkanlar və perspektivlər açır. Müdafiə sahəsində əməkdaşlığın və qarşılıqlı hərbi yardım mexanizmlərinin sənəddə öz əksini tapması həm regionda sabitliyin qorunmasına xidmət edir, həm də müxtəlif revanşist qüvvələrə ciddi mesaj verir. Ümumilikdə, Şuşa Bəyannaməsi Azərbaycanın milli maraqlarının qorunması, regional mövqeyinin gücləndirilməsi və Türkiyə ilə strateji tərəfdaşlığının daha da möhkəmləndirilməsi baxımından olduqca böyük əhəmiyyətə malikdir. Bu gün Azərbaycan artıq əvvəlki kimi təklənmiş ölkə deyil. Həm Azərbaycan, həm də Türkiyə güclənib və iki dövlət arasındakı münasibətlər ən yüksək səviyyəyə yüksəlib. Şuşa Bəyannaməsi məhz bu qardaşlığın, strateji müttəfiqliyin və ortaq gələcək hədəflərin tarixi təsdiqidir. Hesab edirəm ki, sənədin əhəmiyyətini gələcək nəsillər daha aydın şəkildə görəcək və onun Azərbaycan-Türkiyə münasibətlərinin inkişafında oynadığı rolu yüksək qiymətləndirəcəklər”.
Ayhan
18:45 12.06.2026
Oxunuş sayı: 66
