Xarici xəbərlər

ABŞ və İsrail hədəflərinə Hörmüz boğazı ətrafında zərbələr endirilib

İran və ABŞ arasında gərginlik yeni hücumlarla daha da artıb.

Crossmedia.az xəbər verir ki, İslam İnqilabı Keşikçiləri Korpusu (İİKK) tərəfindən yayılmış bəyanata görə, ABŞ silahlı qüvvələri Hörmüz boğazı yaxınlığında İran neft tankerini “Hellfire” raketi ilə hədəfə alıb və gəminin mühərrik otağına ziyan vurub. Hadisənin Hörmüz boğazı ərazisində baş verdiyi bildirilir.

İİKK-nin məlumatına əsasən, bu hücuma cavab olaraq bölgədə “Sionist-Amerika düşmən gəmisi” kimi təqdim edilən bir hədəfə raket zərbəsi endirilib. Daha sonra ABŞ tərəfinin Qeşm adasında yerləşən İİKK rabitə obyektinə hücum etdiyi iddia olunub.

Bəyanatda qeyd edilir ki, bunun ardınca İİKK Aerokosmik Qüvvələri region ölkələrindən biri olan Küveyt ərazisində yerləşən ABŞ hərbi bazasına və helikopter bazasına, həmçinin Bəhreyndəki ABŞ Hərbi Dəniz Qüvvələrinin Beşinci Donanmasının qərargahına raket və pilotsuz uçuş aparatları ilə zərbələr endirib.

ABŞ Hərbi Dəniz Qüvvələrinin Beşinci Donanması hadisələrlə bağlı rəsmi açıqlama verməyib.

İİKK bəyan edib ki, əvvəlcədən xəbərdarlıq edildiyi kimi, təcavüzə cavab bundan sonra daha sərt olacaq və Hörmüz boğazının təhlükəsizliyinə təhdidlərin “baha başa gələcəyi” vurğulanıb.

🖨 Çap et

12:08 03.06.2026

Oxunuş sayı: 48