Dövlət Baxçalı Türkiyədəki səfirimizlə görüşdü
Türkiyənin Milliyyətçi Hərəkat Partiyasının (MHP) sədri Dövlət Baxçalı Azərbaycanın Ankaradakı səfiri Rəşad Aslanovu qəbul edib.
Crossmedia.az xəbər verir ki, görüşün iki ölkə arasındakı münasibətlərdə yaranan gərginliyi yumşaltmaq və qardaşlıq bağlarının gücünü nümayiş etdirmək məqsədi daşıdığı bildirilir.
Baxçalı yazılı açıqlamasında isə qeyd edib:
“Türkiyəni Türk dünyasından ayrı qiymətləndirən, Türkiyəsiz Türk dünyası hesabını reallaşdırmağa çalışan yanaşmaları diqqətlə izləyirik. Türk dövlətləri arasındakı münasibətlər kənardan qurulan siyasi layihələrə, geosiyasi hesablara və ayırıcı planlara endirilə bilməyəcək qədər dərin tarixi təmələ malikdir. Türk dünyasının gələcəyi müstəqil dövlətlərimizin suverenliyinə, qarşılıqlı hörmətə, bərabər tərəfdaşlığa, etibara və qardaşlıq hüququna əsaslanır.
Gələn həftə Ankarada keçiriləcək Türk Dövlətləri Təşkilatının Zirvə görüşü məhz bu tarixi məsuliyyətin və ortaq gələcək iradəsinin mühüm təzahürü olacaq. Türk dünyasının gücünü qarşılıqlı etimad və həmrəylik içində tapması lazımdır. Bu birlikdən narahat olanların gözləntiləri qardaş dövlətlərimizin ortaq iradəsi qarşısında cavabsız qalacaq. Cənab Prezidentimizin Azərbaycan Prezidenti İlham Əliyevi Ankaradakı zirvəyə dəvət etməsi Türkiyə-Azərbaycan münasibətlərinin daşıdığı tarixi və strateji dəyərin qorunması baxımından xüsusi əhəmiyyət daşıyır.
Türkiyə ilə Azərbaycan arasındakı bağlar gündəlik siyasi inkişafların və müvəqqəti anlaşılmazlıqların fövqündədir. Bu bağlar ortaq tarix, dil, mədəniyyət, qarşılıqlı etimad və xalqlarımızın ürək birliyi üzərində yüksəlir. Dövlətlər arasında fərqli qiymətləndirmələr və həllini gözləyən məsələlər təbii ki, ola bilər. Əsas olan bu məsələləri qardaşlıq hüququnu pozmadan, qarşılıqlı anlaşma və birbaşa dialoq yolu ilə həll etmək iradəsidir. Türkiyə ilə Azərbaycanın bir-birinə olan etimadının qorunması, iki dövlət arasındakı həmrəyliyin davam etdirilməsi və Türk dünyasının ortaq gələcəyinin təminatı baxımından əvəzolunmazdır.”
21:52 23.10.2026
Oxunuş sayı: 49
