Xarici xəbərlər
Üç neft tankeri Hörmüzdən gizli rejimdə keçib
Üç neft tankeri Hörmüz boğazından izləmə sistemləri deaktiv edilmiş vəziyyətdə keçib.
Crossmedia.az Reuters agentliyinə istinadən xəbər verir ki, xam neft daşıyan gəmilər İran tərəfindən mümkün hücum riskindən yayınmaq məqsədilə transponderlərini söndürüb.
Kpler və LSEG şirkətlərinin gəmiçilik məlumatlarına əsasən, bazar günü boğazdan hər biri 2 milyon barel İraq nefti daşıyan “Agios Fanourios I” və “Kiara M” adlı iki supertanker keçib.
Məlumata görə, “Agios Fanourios I” tankerinin mayın 26-da Vyetnamdakı Nghi Son neft emalı və neft-kimya kompleksinə çatması gözlənilir. Tankerin aprelin 17-də Basrah Medium markalı nefti yüklədikdən sonra boğazı ən azı iki dəfə keçməyə cəhd etdiyi, lakin uğursuz olduğu bildirilir.
Kpler-in məlumatına əsasən, “Kiara M” tankeri də bazar günü Körfəzi izləmə sistemi söndürülmüş vəziyyətdə tərk edib. San-Marino bayrağı altında üzən gəminin 2 milyon barel Basrah neftini harada boşaldacağı isə hələ məlum deyil.
Nigar Xəlilli
18:00 11.05.2026
Oxunuş sayı: 259
