ABŞ kəşfiyyatı: İran gözlənildiyindən daha uzun müddətə davam gətirə bilər
ABŞ kəşfiyyatının Ağ Evə təqdim etdiyi yeni hesabatda İranla bağlı müxtəlif ssenarilər və regional iqtisadi təsirlər dəyərləndirilib.
Crossmedia.az xəbər verir ki, “The Washington Post”un məlumatına əsasən, sənəddə İranın daha uzun müddət davam gətirə biləcək potensiala malik olduğu qeyd olunur.
Bildirilib ki, İranın “radikal” xarakterli yeni yanaşmasının əvvəlki dövrlə müqayisədə daha yüksək müqavimət qabiliyyəti yaratdığı iddia edilir. Sənəddə Tehran rəhbərliyinin neft ixracı strategiyasını dəyişərək daha kiçik həcmdə quru yollarla daşımalar həyata keçirə biləcəyi, dəniz yolu ilə isə blokadaları yararaq ixracı davam etdirməyə çalışacağı qeyd olunur.
Həmçinin İranın Əfqanıstan və Pakistan istiqamətindən müəyyən həcmdə neft məhsulları tədarük edə biləcəyi ehtimalı irəli sürülür.
ABŞ kəşfiyyat rəsmisinə istinadla bildirilib ki, uzunmüddətli embarqolar və müharibə şəraitində belə rejimlərin illərlə davam gətirə bildiyi vurğulanır. Məlumatda Hörmüz boğazının bağlı qalmasının qlobal iqtisadiyyata ciddi zərbə vuracağı, ABŞ daxil olmaqla dünya iqtisadiyyatını tənəzzülə sürükləyə biləcəyi qeyd olunur.
Hesabatda İranın nüvə və raket proqramları ilə bağlı mümkün güzəştlərin qlobal iqtisadi sabitlik qarşılığında real görünmədiyi də vurğulanıb.
14:53 08.05.2026
Oxunuş sayı: 50
