Putinin mühafizəsi gücləndirilib – Çevriliş və sui-qəsd qorxuları ARTIR
Rusiyada hərbi rəhbərliyə qarşı sui-qəsd iddiaları və mümkün çevriliş ehtimalları fonunda prezident Vladimir Putinin şəxsi mühafizəsinin gücləndirildiyi bildirilir.
Crossmedia.az xəbər verir ki, CNN-in məlumatına görə, Avropa kəşfiyyat orqanları Kremlin daxilində təhlükəsizlik tədbirlərinin sərtləşdirildiyini qeyd ediblər. Məlumata əsasən, prezidentlə birbaşa çalışan aşpazlar, cangüdənlər və fotoqraflar ictimai nəqliyyatdan istifadədən məhrum edilib.
Bundan əlavə, Putinin yaxın ətrafına ikiqat yoxlama prosedurları tətbiq olunduğu, həmçinin onunla işləyən şəxslərin yalnız internetə çıxışı olmayan telefonlardan istifadə etdiyi iddia olunur.
Məlumata görə, Rusiya daxilində və xaricində artan gərginlik, iqtisadi çətinliklər və ictimai narazılıq əlamətləri Kremlin təhlükəsizlik narahatlıqlarını daha da artırıb.
Rusiya tərəfi bu iddialarla bağlı hələlik rəsmi açıqlama verməyib.
17:27 04.05.2026
Oxunuş sayı: 55
