2026-cı ilin ən yaxşı iPhone modelləri açıqlanıb – SİYAHI
Britaniyanın “The Telegraph” nəşri 2026-cı ildə alınması tövsiyə olunan ən yaxşı iPhone modellərini müəyyənləşdirib. Siyahı hazırlanarkən smartfonların kamera imkanları, performansı, batareya ömrü və qiyməti nəzərə alınıb.
Crossmedia.az xəbər verir ki, UNIAN bu barədə “The Telegraph” nəşrinə istinadən məlumat yayıb.
Britaniyalı jurnalist aktual iPhone modellərini bir neçə həftə, bəzilərini isə aylarla sınaqdan keçirərək müxtəlif ehtiyac və büdcələrə uyğun seçimlər hazırlayıb.
iPhone 17 – əksər istifadəçilər üçün ən yaxşı seçim
Ekspertin fikrincə, standart iPhone 17 qiymət və funksionallıq baxımından ən uğurlu modellərdən biridir.
Smartfon 6,3 düymlük, 120 Hz yenilənmə tezliyinə malik OLED ekran, Always-On Display funksiyası və 48 meqapiksellik əsas və ultra genişbucaqlı kameralarla təchiz olunub.
Sınaqlar zamanı günün sonunda cihazın batareyasında 30–40 faiz enerji qaldığı bildirilib. Əsas çatışmazlıq isə Pro modellərindəki telefoto kameranın olmamasıdır.
iPhone 16 və 16 Plus – qiymət və keyfiyyət balansına görə
Daha sərfəli seçim axtaran istifadəçilərə iPhone 16 və iPhone 16 Plus tövsiyə edilir.
Bu modellər Apple Intelligence funksiyalarını dəstəkləyir, keyfiyyətli kameraya və rahat alüminium korpusa malikdir.
iPhone 16 modeli 6,1 düymlük, Plus versiyası isə 6,7 düymlük OLED ekranla təchiz edilib. Bununla belə, ekranların yenilənmə tezliyi 60 Hz ilə məhdudlaşır.
Ekspert xüsusilə iPhone 16 Plus modelinin uzun batareya ömrünü üstünlük kimi qiymətləndirib.
iPhone 18 Pro və 18 Pro Max – foto və video çəkilişləri üçün
Peşəkar mobil fotoqrafiya ilə maraqlanan istifadəçilər üçün iPhone 18 Pro və Pro Max modelləri fərqləndirilib.
Hər iki smartfon A20 Pro prosessoru, üç ədəd 48 meqapiksellik kamera, dəyişən diafraqma və 8 qat optik yaxınlaşdırma imkanları ilə diqqət çəkir.
Cihazların yüksək performansı, təkmilləşdirilmiş istilik idarəetməsi və uzun batareya ömrü əsas üstünlüklər sırasında göstərilib.
Lakin bu modellərin yüksək qiyməti və əvvəlki nəsillərlə müqayisədə daha ağır olması çatışmazlıq kimi qeyd edilib.
Nəşrin qənaətinə görə, əksər istifadəçilər üçün iPhone 17 daha balanslı seçimdir. Daha münasib qiymət istəyənlər əvvəlki nəsil modellərə, yüksək səviyyəli kamera imkanlarına üstünlük verənlər isə Pro seriyasına diqqət yetirə bilərlər.
03:20 25.10.2026
Oxunuş sayı: 69
