Xarici xəbərlər

Zelenski Ukraynanın təhlükəsizliyinə zəmanət tələb edir

Ukrayna Prezidenti Vladimir Zelenski, ABŞ-ın yeni seçilmiş Prezidenti Donald Tramp və Fransa Prezidenti Emmanuel Makronla apardığı müzakirələr zamanı Rusiya ilə münaqişənin dondurulması riskinin artdığına diqqət çəkib. O, Ukraynanın təhlükəsizliyinə zəmanət verilməsinin vacibliyini vurğulayıb.

Crossmedia.az xarici KİV-ə istinadən xəbər verir ki, şənbə günü Parisdə keçirilən görüşdə Zelenski, Rusiya Prezidenti Vladimir Putinin müharibəni bitirmək niyyətində olmadığını bir daha bəyan edib.

Bazar ertəsi Kiyevdə jurnalistlərlə görüşən Zelenski, Putini geri çəkilməyə məcbur etməyin yollarını müzakirə etdiyini bildirərək, “Heç kim müharibəni bizdən çox bitirmək istəmir,” deyə əlavə edib. O, Ukraynanın güclü orduya və uzaq məsafədən zərbə endirmək qabiliyyətinə malik olmasının münaqişənin həllində həlledici rol oynayacağını qeyd edib:

“Biz Putini geri çəkilməyə məcbur etməliyik – və bunu yalnız Ukrayna güclü olduğu halda edə bilər.”

Prezident, Ukraynanın atəşkəs danışıqlarına yalnız güc mövqeyindən daxil olmağı planlaşdırdığını da bildirib.

Aytac Bəhruzqızı