GADTB-dən Azərbaycan Türk millətinə çağırış: tarixdən dərs almaq zamanıdır
10 dekabr 2024-cü il tarixində Güney Azərbaycan Demokratik Türk Birliyi (GADTB) Azərbaycan Türk millətinə müraciət edib.
Crossmedia.az xəbər verir ki, müraciətdə 1945-ci ildə Pişəvəri tərəfindən qurulan Azərbaycan Milli Hökuməti və ya 21 Azər Hərəkatının tarixi təcrübəsindən düzgün dərs almağın vacibliyi vurğulanıb.
Bəyanatda qeyd olunur ki, hazırkı beynəlxalq siyasi vəziyyət və İran hökumətinin siyasi-ideoloji süqut mərhələsində olması Güney Azərbaycan üçün tarixi fürsət yaradır. Orta Şərqdəki çətinliklər və Azərbaycanın iqtisadi, mədəni, ekoloji, siyasi vəziyyətinin ağırlaşması fonunda milli birlik və müstəqilliyə yönəlmiş birgə səylərin zəruriliyi önə çəkilib.
Müraciətdə bildirilir ki, 55 milyon Azərbaycan türkünün dünya ictimaiyyəti ilə dinc şəkildə əməkdaşlıq edərək daha yaxşı və layiqli bir sistem qurması üçün birləşməsi vacibdir. Türk dövlətləri, qonşu ölkələr və dünya dövlətləri ilə əməkdaşlıq edərək Azərbaycanın müstəqillik və demokratik inkişaf yolunda böyük tarixi irəliləyiş əldə edə biləcəyi vurğulanıb.
Sonda Azərbaycan Türk Milləti gələcək nəsillərin rifahı üçün daha yaxşı iqtisadiyyat, demokratiya, təhsil, ətraf mühit və həyat şəraiti qurmaq məqsədilə birlikdə hərəkət etməyə çağırılıb. Müraciət Güney Azərbaycan Demokratik Türk Birliyi tərəfindən imzalanıb.
Günəş Məmmədova
04:51 10.12.2024
Oxunuş sayı: 13007
