ABŞ-dən sürpriz qərar: İran nefti qısa müddətə “yaşıl işıq” aldı
ABŞ Maliyyə Nazirliyi İran nefti ilə bağlı əməliyyatlara müvəqqəti icazə verən ümumi lisenziya təqdim edib.
Crossmedia.az bu barədə xarici mediaya istinadən xəbər verir.
Qərara əsasən, 20 mart 2026-cı ilədək tankerlərə yüklənmiş İran xam nefti ilə bağlı satış, daşınma və boşaltma əməliyyatlarına 19 aprel gecə yarısına qədər icazə verilir.
Sənəd həmçinin tankerlərin təhlükəsiz lövbər salması, heyətə texniki dəstək, gəmi təmiri və digər əlaqəli xidmətlər üzrə maliyyə əməliyyatlarını da əhatə edir.
ABŞ Maliyyə naziri Skott Bessent qərarı “yüksək ixtisaslaşmış” və “qısamüddətli” adlandırıb. Onun sözlərinə görə, bu addım təxminən 140 milyon barel neftin bazara daxil olmasına imkan verəcək və qlobal qiymətlərə təzyiqi azaltmağa xidmət edəcək.
Nazir vurğulayıb ki, Vaşinqton eyni zamanda Epik Qəzəb əməliyyatı çərçivəsində təzyiq siyasətini davam etdirəcək. ABŞ administrasiyası maksimum təzyiq rejimini saxlayaraq İranın beynəlxalq maliyyə sisteminə çıxışını məhdudlaşdırdığını və bu səbəbdən Tehranın satışlardan əhəmiyyətli gəlir əldə etməsinin çətin olacağını bildirir.
10:14 21.03.2026
Oxunuş sayı: 49
