Sosium

Kişilər qadınlara nə hədiyyə edəcək?- Şəhər sakinləri arasında sorğu

Martın gəlişi ilə birlikdə hamımızın ağlında tək bir sual yaranır: "Bu il 8 Martda nə hədiyyə almalı?". Hər il olduğu kimi, bu il də bəylər sevdikləri xanımları sevindirmək üçün böyük bir axtarışa çıxıblar. Biz də qərara gəldik ki, cənablar arasında kiçik bir sorğu keçirərək onların seçimlərini öyrənək. Maraqlıdır, kişilər daha çox klassik hədiyyələrə üstünlük verirlər, yoxsa bu il kreativ ideyalar ön plandadır? Sorğumuz zamanı həm düşündürücü, həm də üzümüzdə təbəssüm yaradan bir-birindən fərqli cavablarla qarşılaşdıq. Bəziləri üçün gül dəstəsi əvəzolunmazdır, bəziləri isə daha praktik və yadda qalan sürprizlərin tərəfdarıdır. İndi isə gəlin, bu maraqlı sorğunun nəticələrinə birlikdə nəzər salaq və bəylərin xanımları üçün hazırladıqları gizli planları kəşf edək.

XXX

"Mən anama gül aldım ki, o çox sevinsin. Anam gülləri çox sevir. Gülləri ona verib, "bayramın mübarək" deyəcəyəm. Çünki mənim anam dünyanın ən yaxşı anasıdır!"

XXX

"Vallah, hələ indi yola çıxmışıq, gedirik ki, bir şeylər alaq. Yanımda bu qədər xanım varkən seçim etmək də asan məsələ deyil, məsuliyyətimiz böyükdür. Məndən soruşsanız, qadın üçün ən gözəl hədiyyə elə daş-qaşdır, qızıldır, gümüşdür. Parıltılı bir şey olsun ki, həm göz oxşasın, həm də dəyərini itirməsin. Elə buna görə də birbaşa zərgərlik dükanına tərəf gedirik. Xanımların könlünü xoş etməyin ən qısa yolu elə budur!"

XXX

"Mənim üçün hədiyyənin kiçiyi-böyüyü yoxdur, amma mən bu il yoldaşım üçün xüsusi bir sürpriz etdim və ona iki mərtəbəli villa aldım. Xanımıma hər şeyin ən yaxşısı yaraşır, ona görə də bu bayramı yeni evimizdə qeyd edəcəyik. Əslində hədiyyə dediyin bir az sanballı və yadda qalan olmalıdır. Bizdə miqyas belədir, xanım xoşbəxtdirsə, deməli bayram uğurlu keçib!"

XXX

"Vallah, düzünü desəm, mən bu bayramı elə də qeyd eləmirəm, mənim üçün o qədər də əhəmiyyətli deyil. Belə şeylər bizlik deyil, həm də mənə elə gəlir ki, qadına qiymət vermək üçün xüsusi bir təqvim gözləməyə ehtiyac yoxdur. İndi hamı gedib növbəyə duracaq, süni bahalıq yaradacaqlar, nə mənası var? Yoldaşıma da demişəm ki, adi gündür də, əsas odur hörmət olsun, yoxsa bir günlə heç nə dəyişmir. Boş-boş xərclərə gərək görmürəm."

XXX

"Çox dərinə getməyə ehtiyac yoxdur, mən hər il olduğu kimi bu il də bir dəstə gül alıb məsələni bağlayacağam. Qadın qəlbi elədir ki, bir gül verirsən, könlü xoş olur, dünyalar onun olur. Artıq-əskik xərcə, böyük-böyük planlara nə gərək var, əsas odur yadımızdan çıxmayıb, bir dəstə gül bəsidir."

Beləliklə, keçirdiyimiz bu kiçik sorğu bizə bir daha sübut etdi ki, 8 Mart hər kəs üçün fərqli məna kəsb edir. Kimisi üçün bu bayram bahalı villalar və parıltılı qızıllarla ölçülürsə, kimisi üçün bir dəstə gülün səmimiyyəti və uşaq qəlbinin saflığı hər şeydən üstündür. Hətta bayramı qəbul etməyənlər belə, əslində bu günün yaratdığı o qaçhaqovun və diqqətin bir parçasına çevrilirlər. Görünən odur ki, hədiyyənin miqyası nə olursa olsun – istər kiçik bir çiçək, istərsə də iki mərtəbəli villa – əsas olan o diqqəti hiss etdirməkdir.