Rusiya səfiri sərt danışdı: Ermənistan və KTMT yaranmış problemi birgə həll edə bilər
Rusiya tərəfi Ermənistanın KTMT ilə münasibətlərinə dair açıqlama yayıb. Belə ki, Rusiyanın İrəvandakı səfiri Sergey Kopırkin açıqlamasında bildirib ki, Ermənistan və KTMT Ermənistan ilə bu hərbi ittifaq arasında yaranmış problemlərə dair kompromis həllər tapa bilərlər.
Crossmedia.az bu barədə erməni KİV-nə istinadən məlumat verir.
Kopırkin bildirib ki, son günlər Ermənistan rəhbərliyinin nümayəndələri tərəfindən açıq bəyanatlar səslənib, xüsusilə də “dondurulmuş statusun dəyişməyəcəyi” barədə fikirlər ifadə olunub.
“Rusiya Federasiyasının mövqeyi ondan ibarətdir ki, Ermənistan KTMT-nin tamhüquqlu üzvü olaraq qalır. Dondurulma formatı isə təşkilatın müqavilə-hüquqi bazasında nəzərdə tutulmayıb. Bizim inamımıza görə, regionda təhlükəsizliyi təmin edəcək alternativ və etibarlı mexanizm yoxdur. KTMT ilə qarşılıqlı əlaqə zamanı yaranmış problemlərə gəldikdə isə hesab edirik ki, təşkilat iştirakçılarının dairəsində hər zaman ortaq, tərəfdaşlıq ruhunda həll yolları tapmaq, o cümlədən kompromis həllər tapmaq mümkündür”, – deyə rusiyalı diplomat vurğulayıb.
Səfir həmçinin qeyd edib ki, Ermənistanın Qərblə yaxınlaşması və xarici siyasət əlaqələrini genişləndirməsi Moskva ilə İrəvan arasındakı münasibətlərdə yeni çağırışlar yaradır.
“Bilirik ki, Avropa İttifaqı hazırda Rusiya Federasiyasına qarşı düşmən siyasəti yürüdür və öz partnyorlarına bu siyasəti, o cümlədən sanksiyaları dəstəkləməyi açıq şəkildə tövsiyə edir. Təbii ki, bu, münasibətlərimizdə yeni çağırışlar yaradır və hər iki tərəfdən ağıllı, ölçülü, müdrik və strateji yanaşma tələb edir”, – Kopırkin deyib.
Rusiya səfiri əlavə edib ki, Moskva “Tramp Marşrutu” layihəsinə Rusiyanın cəlb olunması imkanlarını müzakirə etməyə hazırdır, xüsusilə də Rusiya və Ermənistanın dəmiryolu sahəsində əməkdaşlığını nəzərə alaraq. Kopırkinin sözlərinə görə, Rusiya “Tramp Marşrutu – beynəlxalq sülh və tərəqqi üçün” layihəsi ətrafında baş verənləri diqqətlə izləyir.
Turqut Ansari
18:03 06.02.2026
Oxunuş sayı: 373
