Macarıstanın baş naziri Viktor Orban bildirib ki, Macarıstan NATO müttəfiqlərinin Ukraynaya öz qoşunlarını göndərmək qərarını dəstəkləməyəcək, çünki bu addım Rusiya ilə müharibə anlamına gələr.
Crossmedia.az xəbər verir ki, Orban bu fikirləri “Kossuth” radiosunun səhər proqramında NATO-nun baş katibi Mark Ruttenin son çıxışını şərh edərkən səsləndirib.
Baş nazir xatırladıb ki, Rutte 3 fevralda Ukrayna Ali Radasında Kiyevə səfəri zamanı “istəkli ölkələr koalisiyası”nın silahlı qüvvələrinin Rusiya ilə sülh sazişi imzalandıqdan dərhal sonra Ukrayna ərazisində – quruda, dənizdə və havada – yerləşdiriləcəyini deyib.
Orban vurğulayıb ki, məsələ təkcə NATO baş katibinin sözləri ilə məhdudlaşmır, həm də Fransa və Böyük Britaniya arasında Ukraynaya qoşun göndərilməsi ilə bağlı yazılı razılaşmalar mövcuddur. Onun fikrincə, Qərb bu yolla Kiyevə təhlükəsizlik zəmanətləri vermək istəyir, lakin bu addım əksinə, Rusiya ilə birbaşa qarşıdurma riskini artırır.
“Ruslar hər gün xəbərdarlıq edirlər: bunu etməyin, çünki Qərb ölkələrinin əsgərləri Ukrayna ərazisinə daxil olarsa, hərbi hədəfə çevriləcəklər”, – deyə Orban bildirib. O qeyd edib ki, bu ssenari Avropa ordusunun Ukrayna ərazisində Rusiya qüvvələri ilə üz-üzə gəlməsi deməkdir.
Baş nazirin sözlərinə görə, Macarıstan heç bir halda nə Rusiya, nə də Ukrayna ərazisində müharibəyə cəlb olunmayacaq. O əlavə edib ki, Budapeşt NATO müttəfiqlərini tam deyil, yalnız qismən dəstəkləməyə hazırdır.
