ABŞ 2026-cı il müdafiə büdcəsində Ukraynaya yardımı təsdiqləyib
ABŞ Nümayəndələr Palatası 2026-cı il üçün Milli Müdafiə Qanunu layihəsini (NDAA) təsdiqləyib. Qanunda müdafiə büdcəsi çərçivəsində Ukraynaya yardım üçün vəsait də nəzərdə tutulub. 2026-cı il üçün ABŞ-ın ümumi müdafiə büdcəsi 900 milyard dollar təşkil edəcək. Orezident Donald Trampın mövqeyinə baxmayaraq, bunun 800 milyon dolları Ukraynaya yardım üçün ayrılacaq.
Crossmedia.az xarici mediaya istinadən xəbər verir ki, qanunda Avropa müdafiəsinə də xüsusi diqqət yetirilib. Ağ Evə Avropadakı hərbi kontingentin sayını 45 gündən uzun müddət 76 min nəfərin altına endirmək qadağan edilib. Həmçinin əsas hərbi texnikanı çıxarmaq və ya ötürmək qadağan olunub.
Bundan əlavə, ABŞ Ukrayna Təhlükəsizlik Yardımı Təşəbbüsü (USAI) üçün 400 milyon dollar ayırıb və proqramın müddəti 2029-cu ilə qədər uzadılıb. Digər 400 milyon dollar isə Ukraynanın digər ehtiyacları üçün nəzərdə tutulub.
Qeyd olunur ki, konqres hələ də 2026-cı maliyyə ili üçün Pentaqonun xərclərini ayrıca təsdiqləməlidir. ABŞ-da maliyyə ili təqvim ilindən fərqli olaraq sentyabr ayında başlayıb, sentyabrda başa çatır.
Sevinc Yarməmmədova
11:36 11.12.2025
Oxunuş sayı: 1051
