Avstraliyada qadağa qüvvəyə mindi: milyonlarla yeniyetmə sosial mediaya girişini itirir
Avstraliyada 16 yaşdan kiçik uşaqlar və yeniyetmələrin sosial media hesablarına girişini məhdudlaşdıran dünyada ilk qadağa qüvvəyə minib.
Crossmedia.az "BBC"-ə istinadən xəbər verir ki, yeni qanun Instagram, Facebook, Threads, X, Snapchat, TikTok, Reddit, YouTube və digər platformalara şamil olunur. Qaydanın pozulmasına görə istifadəçilər cəzalandırılmayacaq, lakin platformalar 49,5 milyon Avstraliya dollarına qədər cərimələnə bilər.
Hökumət bu addımın gəncləri zərərli məzmundan qorumağa yönəldiyini bildirir, lakin tənqidçilər qadağanın əks təsir göstərə biləcəyini, yeniyetmələri həm sosial mühitdən təcrid edə, həm də onları internetin nəzarətsiz sahələrinə yönəldə biləcəyini vurğulayırlar. Analitiklərin sözlərinə görə, bu addım bir çox ölkələr tərəfindən diqqətlə izlənir, lakin Avstraliyanın uğuru necə qiymətləndirəcəyi hələlik bəlli deyil.
Yerli yeniyetmələr arasında məsələ ilə bağlı fikir ayrılığı mövcuddur. Bəziləri qadağanı “təhqir” kimi qiymətləndirir, digərləri isə “tezliklə bunun öhdəsindən gələcəklərini” deyirlər. Media orqanları bildirir ki, hökumət bu siyasətin sosial təsirlərini yaxından monitorinq edəcək.
Türkan Kərimli
23:37 09.12.2025
Oxunuş sayı: 1152
