Prezident tərəfindən təltif edilməyim mənim və rəhbərlik etdiyim kollektivin üzərinə daha böyük məsuliyyət qoyur - Akademik
Prezident İlham Əliyevin Azərbaycan elminin inkişafına verdiyi yüksək qiymətin və davamlı dəstəyin bariz nümunəsi olaraq, 5 noyabr 2025-ci il tarixində imzaladığı Sərəncamla Azərbaycan Milli Elmlər Akademiyasının (AMEA) 80 illik yubileyi münasibətilə bir sıra görkəmli alimlər dövlət ordeni, medalları və fəxri diplomlarla təltif olunub. Bu Sərəncam sadəcə fərdi nailiyyətlərə təşəkkür etmək məqsədi daşımır, həm də ölkədə elmi fəaliyyətə göstərilən sistemli diqqət və qayğının, elmi potensialın gücləndirilməsinin strateji əhəmiyyətini vurğulayır. İmzalanmış bu Sərəncam elmi düşərgənin motivasiyasını artıraraq, yeni nəticələrə yol açacaq bir addımdır. Bu təltiflər Azərbaycan elminin son illərdəki dinamik inkişafını – xüsusilə müstəqillik dövründə AMEA-nın beynəlxalq səviyyədə tanınmışlığı, innovativ layihələrin sayı və gənclərin elmi fəaliyyətə cəlb edilməsini – daha da gücləndirəcək. Prezident Əliyevin elmə verdiyi prioritet ölkənin iqtisadi və sosial tərəqqisinə, “Rəqəmsal Azərbaycan” və “Yaşıl Enerji” kimi strateji proqramlara inteqrasiya olunmuş elmi tədqiqatların inkişafına xidmət edir. Nəticədə, bu addım elmi cəmiyyətdə yeni nəsil alimlərin formalaşmasına və beynəlxalq əməkdaşlığa töhfə verəcək.
Prezident İlham Əliyevin sərəncamına əsasən “Şöhrət” ordeni ilə təltif edilmiş akademik, AMEA-nın vitse-prezidenti İradə Hüseynova Crossmedia.az-a açıqlama verib: “Azərbaycan Respublikasının Prezidenti cənab İlham Əliyevin Sərəncamı ilə “Şöhrət” ordeninə layiq görülməyim xəbərini böyük sevinc, dərin həyəcan və məsuliyyət hissi ilə qarşıladım. Ümummilli Lider Heydər Əliyevin əsasını qoyduğu elm siyasəti və müstəqillik dövründə formalaşdırılmış milli intellektual inkişaf modeli Prezident İlham Əliyevin rəhbərliyi ilə yeni dövrün çağırışlarına uyğun şəkildə daha da təkmilləşdirilmiş və müasir dövlət siyasətinin əsas prinsip və istiqamətlərindən birinə çevrilmişdir. Son illərdə cənab Prezidentin rəhbərliyi ilə həyata keçirilən islahatlar, elmi idarəetmə sisteminin optimallaşdırılması və modernləşdirilməsi, alimlərin sosial müdafiəsinin gücləndirilməsi, innovasiyaların iqtisadiyyatla inteqrasiyası və beynəlxalq elmi əməkdaşlığın genişləndirilməsi istiqamətində atılan ardıcıl addımlar ölkə elminin keyfiyyətcə yeni mərhələyə yüksəlməsini təmin etmişdir. Bu gün Azərbaycan qlobal miqyasda elm və texnologiyalar sahəsində öz mövqeyini yaxşılaşdırmaqda, dövlətimiz tərəfindən elmə, təhsilə, ziyalılara və gənc alim nəslinin yetişdirilməsinə göstərilən diqqət və qayğı real nəticələr verməkdədir”.
Akademik həmçinin qeyd edib ki, bu kontekstdə “Şöhrət” ordeni onun üçün təkcə fərdi nailiyyətlərə verilən diqqətin göstəricisi deyil, həm də Azərbaycan alimlərinə, onların fədakar tədqiqat fəaliyyətinə və dövlətimizin elmə verdiyi strateji dəyərə yönəlmiş yüksək etimadın ifadəsidir: “Cənab Prezident tərəfindən təltif edilməyim mənim və rəhbərlik etdiyim kollektivin üzərinə daha böyük məsuliyyət qoyur və bu məsuliyyəti dərin qürur hissi ilə qəbul edirəm. Əmin edirəm ki, bundan sonra da elmi-tədqiqat və təşkilati fəaliyyətim milli inkişaf strategiyasına və dövlətimizin ali məqsədlərinə sadiq qalaraq, Azərbaycanın elm və təhsilinin inkişafına və beynəlxalq səviyyədə nüfuzunun daha da artmasına xidmət edəcəkdir”.
Ayhan
18:41 07.11.2025
Oxunuş sayı: 1807
