Orban: Avropa sürətlə müharibəyə doğru sürüklənir
Macarıstanın baş naziri Viktor Orban Avropa İttifaqının (Aİ) Ukraynaya hərbi dəstək planına etiraz olaraq ölkə daxilində imza toplama kampaniyasına başladığını açıqlayıb.
Crossmedia.az xəbər verir ki, bu barədə Orban sosial şəbəkədə məlumat yayıb.
O, bildirib ki, bir neçə həftə əvvəl Kopenhagendə təqdim olunan “Brüsselin hərbi planı”na əsasən, Avropa ödəyir, ukraynalılar döyüşür, Rusiya isə sonda tükənir.
“Bu planın nə qədər davam edəcəyi və Avropaya nə qədər baha başa gələcəyi barədə bizə heç nə deyilməyib", – deyə Orban narazılığını ifadə edib.
Macarıstan liderinin sözlərinə görə, Avropa getdikcə daha sürətlə müharibəyə doğru sürüklənir. Buna görə də o, ölkənin hər bir şəhər və kəndində imza toplama kampaniyası keçirmək niyyətindədir.
Qeyd edək ki, gələn il Macarıstanda parlament seçkiləri keçiriləcək. Müşahidəçilərin fikrincə, Orban hökuməti seçkilər ərəfəsində anti-Ukrayna və anti-Avropa ritorikasını daha da gücləndirir.
Xumar Emilqızı
11:57 12.10.2025
Oxunuş sayı: 6645
