Hərbi Prokurorluqda Hərbi İnstitutun kursantları ilə görüş keçirilib
Sentyabrın 26-da Anım Günü ilə əlaqədar
Hərbi Prokurorluğun və Heydər Əliyev adına Hərbi İnstitutun rəhbərliyinin
iştirakı ilə Hərbi Prokurorluqda həmin təhsil müəssisəsinin kursantları ilə
birlikdə tədbir keçirilib.
Crossmedia.az xəbər verir ki, Hərbi Prokurorluğun mətbuat xidmətindən bildirilib ki, əvvəlcə Hərbi
Prokurorluğun inzibati binasında yerləşən "Heydər Əliyev guşəsi"ndə
Ulu Öndər Heydər Əliyevin büstü önünə gül dəstələri düzülüb.
Ardınca Hərbi Prokurorluq nəzdində
fəaliyyət göstərən "Soyqırımı" memorial muzeyi ziyarət edilib.
Tədbirdən öncə mərasim iştirakçıları
Heydər Əliyevin, ölkəmizin müstəqilliyi və ərazi bütövlüyü uğrunda canlarını
fəda etmiş bütün şəhidlərin əziz xatirələrini birdəqiqəlik sükutla anıblar.
Tədbirdə çıxış edən Baş prokurorun
müavini - hərbi prokuror, ədliyyə polkovniki Bəhruz Əhmədov bildirib ki, müasir
Azərbaycanın memarı və qurucusu Ulu Öndər Heydər Əliyevin müdrik siyasətini
zamanın tələblərinə uyğun şəkildə uğurla davam etdirən Prezident İlham Əliyevin
dərin düşüncəsi və yorulmaz fəaliyyəti ilə xalqın müdrikliyinin və
əzmkarlığının vəhdəti sayəsində dünyada baş verən neqativ proseslərə rəğmən,
dövlətimiz qüdrətlənir, işğaldan azad olunmuş ərazilərimiz də daxil olmaqla,
regionlarımız hərtərəfli inkişaf edir.
Hərbi prokuror vurğulayıb ki, qazanılan
ardıcıl uğurlara Birinci vitse-prezident Mehriban Əliyevanın çoxşaxəli və
zəngin fəaliyyəti mühüm töhfələr verir.
Ölkəmizin sürətli inkişafının Silahlı
Qüvvələrin qüdrətlənməsinə də rəvac verdiyini deyən Hərbi prokuror bildirib ki,
Müzəffər Ali Baş Komandan İlham Əliyevin yüksək diqqət və qayğısı sayəsində
müasir tələblərə tam cavab verən, istənilən döyüş tapşırığının ən yüksək
səviyyədə yerinə yetirməyə qadir olan Azərbaycan Silahlı Qüvvələri formalaşıb.
Çıxış edən digər şəxslər Vətən
müharibəsindən, Müzəffər Ali Baş Komandanın rəhbərliyi ilə əldə olunan tarixi
qələbədən bəhs ediblər.
Sonda Hərbi prokuror Bəhruz Əhmədov
təhsil göstəriciləri yüksək olan kursantlara hədiyyələr təqdim edib.
19:50 26.09.2025
Oxunuş sayı: 5466
