ABŞ ilə münasibətlərdə yeni dövr başlayır- Deputat
Azərbaycanın iqtisadiyyat naziri
Mikayıl Cabbarovun ABŞ Dövlət Departamentinin Avropa və Avrasiya Məsələləri üzrə
Bürosunun baş rəsmisi Brendan Hanrahan ilə görüşü iki ölkə arasında iqtisadi əməkdaşlığın
inkişafında mühüm əhəmiyyət daşıyır. Görüş zamanı institusional əlaqələrin möhkəmləndirilməsi,
yeni əməkdaşlıq mexanizmləri və investisiya təşəbbüsləri müzakirə olunub. Həmçinin
Strateji Tərəfdaşlıq Xartiyasının hazırlanması məqsədilə Strateji İşçi Qrupunun
yaradılmasına dair Hökumətlərarası Anlaşma Memorandumunun əhəmiyyəti
vurğulanıb. Danışıqlar çərçivəsində Azərbaycanın iqtisadi islahatları, biznes
mühitinin yaxşılaşdırılması və strateji infrastruktur layihələri ABŞ şirkətləri
üçün əlverişli imkanlar kimi təqdim edilib. Görüşlər, həmçinin Zəngəzur dəhlizi
və regional nəqliyyat-logistika layihələrinin iqtisadi əməkdaşlığa töhfələri məsələlərini
əhatə edib.
Bu barədə Crossmedia.az-a danışan
Milli Məclisin deputatı Fazil Mustafa bildirib ki, artıq bu istiqamətdə xeyli məsafə
qət edilib:
"ABŞ-də Donald Tramp administrasiyasının vasitəçiliyi ilə bu görüşün keçirilməsi, paraflanma və sülh sazişinin hazırlanmasında aparılan addımlar, eyni zamanda ABŞ-la strateji əməkdaşlıq layihəsinin hazırlanıb yekunlaşdırılması bizim ən ciddi hədəflərimizdən biridir və bunu gerçəkləşdirməyə çalışırıq. Buna görə bu istiqamətdə böyük işlər görülür. Əminəm ki, yaxın zamanlarda bununla bağlı məsələlər öz konkret həllini tapacaq və bu sənədlərin hazırlanması bütün iqtisadi və digər parametrləri dəqiq analiz etdikdən sonra mümkün olacaq. Yəqin ki, bu məsələyə görə bir qədər gecikir, amma əminəm ki, yaxın zamanlarda bu sənəddə qəbul olunacaq. Bu da ABŞ-la münasibətlərimizin tarixində yeni bir dövrün başlanğıcı olacaq".
Mehriban Yariyeva
21:21 23.09.2025
Oxunuş sayı: 8533
