Azərbaycan beynəlxalq əməkdaşlıqda nüfuzunu gücləndirir- Deputat
Azərbaycan müstəqillik qazandığı ilk gündən beynəlxalq əməkdaşlığın gücləndirilməsini prioritet məsələ kimi qəbul etmiş və bu istiqamətdə ardıcıl siyasət yürütmüşdür. Ölkəmiz beynəlxalq hüquq normalarına, sülh və təhlükəsizlik prinsiplərinə sadiqliyi ilə tanınır. Son illərdə Azərbaycanın regionda və beynəlxalq miqyasda sülh və təhlükəsizliyin təmin edilməsinə verdiyi töhfələr daha da önəmli olub.
2025-ci ilin avqust ayında ABŞ-nin vasitəçiliyi ilə Azərbaycan və Ermənistan arasında imzalanan Birgə Bəyannamə uzun müddət davam edən münaqişəyə son qoymaq və sülhün bərqərar olunması istiqamətində tarixi əhəmiyyət daşıyan addım olmuşdur. Bu baxımdan, beynəlxalq təhlükəsizlik problemlərinin həllində xüsusi xidmət orqanlarının qarşılıqlı əməkdaşlığı həlledici rol oynayır. Hazırkı beynəlxalq konfrans da məhz bu əməkdaşlığın və qarşılıqlı fəaliyyətin önəmini vurğulamaq və gələcəkdə daha təhlükəsiz bir dünyaya töhfə vermək məqsədini daşıyır.
Məsələ ilə bağlı Crossmedia.az-a açıqlama verən Milli Məclisin deputatı Aydın Mirzəzadə bildirib ki, Ulu öndər Heydər Əliyev hakimiyyətə qayıtdıqdan sonra Azərbaycanın beynəlxalq mövqeyinin güclənməsi istiqamətində çox ciddi addımlar atılıb və bu siyasi addımlar Prezident İlham Əliyev tərəfindən uğurla davam etdirilir. “Azərbaycan bu gün arzuolunan tərəfdaşdır, təcrübəsi ilə maraq doğuran bir ölkədir və həm ikitərəfli, həm də çoxtərəfli əməkdaşlıqda etibarlı müttəfiq kimi tanınır. Vaxtaşırı Azərbaycanda beynəlxalq tədbirlərin keçirilməsi ölkəmizin qazandığı nüfuzun nəticəsidir”.
Deputat əlavə edib ki, Azərbaycanın BMT Təhlükəsizlik Şurasının qeyri-daimi üzvü olması və Qoşulmama Hərəkatına dörd il rəhbərlik etməsi beynəlxalq əməkdaşlıqda ölkəmizin əmin-amanlığın möhkəmlənməsinə verdiyi töhfəni açıq şəkildə göstərir. “Bundan sonra da münasibətlər ancaq və ancaq dünyada sülhün bərqərar olması istiqamətində Azərbaycanın atdığı addımlarla siyasətdə olacaq. Bakıda keçirilən beynəlxalq tədbirlər və tez-tez xarici ölkə rəhbərlərinin Azərbaycana səfəri göstərir ki, Azərbaycan artıq yaxşı tərəfdaş imicini qazanıb və bu imic gündən-günə möhkəmlənəcək”.
Mehriban Yariyeva
18:34 22.09.2025
Oxunuş sayı: 4511
