Azərbaycan tolerantlıq və multikulturalizm nümunəsi kimi dünyaya mesaj verir- Rəy
Müasir dünyada etnik və dini zəmində qarşıdurmaların, ksenofobiya və dözümsüzlük hallarının geniş yayıldığı bir zamanda Azərbaycan tolerantlıq və multikulturalizm nümunəsi kimi fərqlənir. Prezident İlham Əliyevin yəhudi icmasına ünvanladığı təbrikdə də vurğulandığı kimi, ölkəmizdə antisemitizmə, ksenofobiyaya və etnik-dini ayrı-seçkiliyə yer yoxdur. Azərbaycanda mədəni müxtəlifliyin qorunması, etnik azlıqların dil və mədəniyyətlərinin inkişafına dövlət səviyyəsində dəstək göstərilməsi, multikultural dəyərlərin təşviqi dövlət siyasətinin mühüm istiqamətlərindəndir. Yəhudiəsilli vətəndaşların ictimai-siyasi həyatda fəal iştirakı və cəmiyyətin milli-mənəvi həmrəyliyinə verdikləri töhfələr isə bu siyasətin bariz göstəricisidir.
Milli Məclisin deputatı Sadiq Qurbanov Crossmedia.az-a açıqlamasında bildirib ki, Azərbaycan müasir dünyada multikulturalizm və tolerantlıq dəyərlərinin təşviq olunduğu nadir məkanlardan biridir.
Onun sözlərinə görə, Prezident İlham Əliyevin Roş ha-Şana bayramı münasibətilə yəhudi icmasına ünvanladığı təbrik məktubu ölkəmizin bu prinsiplərə daim sadiq olduğunu bir daha nümayiş etdirdi:
“Bu təbrik dini bayram münasibətilə yanaşı, həm də ölkəmizin dünyaya ünvanladığı strateji mesaj kimi qiymətləndirilməlidir. Azərbaycan tarixən müxtəlif xalqların və dinlərin sülh şəraitində yaşadığı bir məkan olub. Bu gün də dövlət siyasətində əsas prinsiplərdən biri etnik və dini müxtəlifliyin qorunması, hər bir vətəndaşın öz mədəniyyətini və ənənələrini sərbəst şəkildə yaşatmasıdır. Bu, cəmiyyətimizdə qarşılıqlı etimadı gücləndirir, milli həmrəyliyi möhkəmləndirir”.
Siyasətçi əlavə edib ki, multikultural dəyərlər həm daxili sabitlik, həm də beynəlxalq müstəvidə ölkəmizin imicinin formalaşmasında mühüm rol oynayır:
“Azərbaycanın tolerantlıq modeli dünyada etnik və dini qarşıdurmaların geniş yayıldığı bir dövrdə sülh və dialoqun nümunəsi kimi qəbul edilir. Bu, ölkəmizin yumşaq gücünü artırır və Azərbaycanı beynəlxalq aləmdə etibarlı tərəfdaş kimi təqdim edir. Dünyada antisemitizm, islamofobiya və digər ayrı-seçkilik hallarının artdığı bir vaxtda cənab Prezidentin bu cür təbriki Azərbaycanın qlobal çağırışlara cavabı kimi dəyərləndirilə bilər. Bu, həm də ölkəmizin insan haqlarına, dini azadlıqlara hörmət prinsipinə sadiqliyini nümayiş etdirir”.
S. Qurbanovun sözlərinə görə, Azərbaycanın multikultural siyasəti həm milli birlik, həm də beynəlxalq nüfuz baxımından strateji əhəmiyyət daşıyır:
“Cənab Prezident İlham Əliyevin ayrı-ayrı vaxtlarda müxtəlif dini bayramlarda göndərdiyi təbrik məktubları bu siyasətin davamlılığını və gücünü göstərən mühüm siyasi mesajdır. Bunun nəticələrini biz 44 günlük müharibədə də gördük. Azərbaycan xalqının birliyi və milli həmrəyliyi qələbəmizin əsas səbəblərindən biri oldu”.
Mehriban Yariyeva
11:35 21.09.2025
Oxunuş sayı: 4709
