TDT-nin güclənməsində Azərbaycanın rolu həlledicidir- Deputat
Türk Dövlətləri Təşkilatı (TDT) son illərdə regional və qlobal miqyasda mühüm strateji əməkdaşlıq platformasına çevrilmişdir. Təşkilatın əsası 2009-cu ildə imzalanan Naxçıvan Sazişi ilə qoyulmuş və ötən il bu tarixi sənədin 15 illiyi qeyd edilmişdir. Azərbaycan Baş naziri Əli Əsədovun da vurğuladığı kimi, məhz həmin saziş Türk dünyasının müasir inkişaf yolunun başlanğıcı olmuşdur. Bu gün TDT ortaq tarix, mədəniyyət və dil birliyinə əsaslanaraq üzv dövlətlər arasında çoxşaxəli əməkdaşlığı möhkəmləndirir, iqtisadi əlaqələrin genişlənməsi, nəqliyyat dəhlizlərinin inkişafı və siyasi həmrəyliyin gücləndirilməsi üçün yeni imkanlar açır.
Məsələ ilə bağlı Crossmedia.az-a açıqlama verən Milli Məclisin deputatı Aydın Hüseynov sözlərinə görə 2009-cu ildə Naxçıvanda imzalanan həmin sənəd təsadüfi deyil ki, məhz Azərbaycanın təşəbbüsü və fəal dəstəyi ilə reallaşdı: " O vaxtdan bu günə qədər Prezident İlham Əliyev Türk dövlətlərinin həmrəyliyini gücləndirən bütün təşəbbüslərin önündə dayanıb və Türk Dövlətləri Təşkilatının möhkəmlənməsi üçün qətiyyətli addımlar atıb. Bu gün TDT-nin enerji təhlükəsizliyi, nəqliyyat dəhlizləri, iqtisadi əməkdaşlıq və mədəni inteqrasiya sahələrində qazandığı uğurların hər birində Azərbaycanın imzası görünür. Orta Dəhliz layihəsinin reallaşdırılması, strateji enerji kəmərlərinin və nəqliyyat yollarının üzv ölkələri birləşdirməsi, azad olunmuş ərazilərdə Türk dövlətləri ilə birgə layihələrin icrası Prezident İlham Əliyevin uzaqgörən siyasətinin bariz nəticəsidir. Xüsusən də 44 günlük Vətən müharibəsindən sonra Azərbaycan qazandığı qələbəni Türk dünyasının həmrəyliyi fonunda daha da möhkəmləndirdi. Türk dövlətlərinin Azərbaycana göstərdiyi siyasi və mənəvi dəstək, Qarabağın bərpasında və regionun yeni iqtisadi xəritəsinin formalaşmasında ortaq layihələrin həyata keçirilməsi bir daha göstərdi ki, Prezident İlham Əliyevin türk birliyi ilə bağlı baxışları real nəticələr doğurur".
A. Hüseynov vurğulayıb ki, bu gün Azərbaycan yalnız TDT-nin fəal üzvü deyil, həm də təşkilatın strateji xəttini müəyyənləşdirən aparıcı qüvvədir:
“Naxçıvan Sazişinin 15 illiyi münasibətilə səslənən fikirlər də əslində bir reallığı təsdiqləyir: Prezident İlham Əliyevin qətiyyətli liderliyi olmasaydı, Türk Dövlətləri Təşkilatı bu qədər qısa müddətdə güclü siyasi birlik səviyyəsinə yüksələ bilməzdi. Onun ardıcıl fəaliyyəti nəticəsində Azərbaycan həm regional, həm də qlobal siyasətdə nüfuzunu artıraraq Türk dünyasının həmrəyliyini strateji prioritetə çevirib".
Mehriban Yariyeva
18:43 19.09.2025
Oxunuş sayı: 5288
