“Şuşa beynəlxalq əməkdaşlıq və fəal qlobal dialoq məkanına çevrilib”- RƏY
Şuşa Azərbaycanın yeni diplomatik mərkəzi kimi formalaşır. Burada rəsmi qarşılanma protokolları, fəxri qarovul dəstəsi və mədəni tədbirlər yüksək səviyyədə həyata keçirilir. Şəhər beynəlxalq görüşlər və dünya liderlərinin ziyarətləri üçün hazırdır, eyni zamanda Türk dünyasının ortaq diplomatik və mənəvi mərkəzi kimi də önəm daşıyır.
Şuşa Azərbaycanın diplomatik və mədəni simvolu kimi önəmini artırır. Burada keçirilən beynəlxalq görüşlər və rəsmi tədbirlər şəhərin diplomatik mərkəz statusunu möhkəmləndirir. Eyni zamanda, bu addımlar Azərbaycan diplomatiyasının zəngin ənənələrini və siyasi mədəniyyətini dünyaya təqdim edir.
Mövzu ilə bağlı deputat Müşfiq Cəfərov Crossmedia.az-a açıqlama verib.
Deputat, Şuşada keçirilən tədbirlərin miqyasının böyük və əhəmiyyətli olduğunu bildirib:
“Azərbaycanın mədəniyyət paytaxtı Şuşa artıq regionun diplomatiya, beynəlxalq siyasət mərkəzinə çevrilir. Son illər sürətli bərpa-quruculuq işlərinin aparıldığı qədim və gözəl təbiəti olan bu Azərbaycan şəhəri beynəlxalq mədəni tədbirlərlə yanaşı, diplomatik toplantılara da ev sahibliyi edir. Şəhərin təkcə Azərbaycan üçün deyil, eyni zamanda regional əhəmiyyəti də artmaqdadır. Artıq Prezident İlham Əliyevin rəsmi qəbullarının Qarabağda keçirməsi ənənə halını alıb. Son aylar dövlət başçısının Qarabağ və Şərqi Zəngəzurda reallaşan tədbirlərdə iştirakına, burada keçirdiyi rəsmi qəbullar bunun əyani sübutudur. Əslində bu tədbir və rəsmi görüşlərin böyük siyasi, diplomatik, eyni zamanda, rəmzi mənası var.
Bu gün nəinki Şuşa hətta bütöv Qarabağ təkcə yaşayış məntəqəsi deyil, həm də beynəlxalq əməkdaşlıq və fəal qlobal dialoq məkanına çevrilib. Burada keçirilən yüksəksəviyyəli forumlar, iqtisadi konfranslar və işgüzar tədbirlər şəhərlərin regional əhəmiyyətini və iqtisadi potensialını artırmağa xidmət edir.
Azərbaycanın müxtəlif beynəlxalq tədbirlərə, forumlara, festivallara, yarışlara evsahibliyi xarici qonaqlar tərəfindən də hər zaman yüksək qiymətləndirilir. İki il ərzində Şuşada keçirilən tədbirlərin miqyası böyükdür. Mədəniyyət paytaxtımız artıq milli-mədəni və beynəlxalq tədbirlərin keçirildiyi məkana çevrilib və Prezident İlham Əliyevin xüsusi diqqət və qayğısı ilə yenidən dirçəlib”.
Nicat Rüstəmzadə
21:54 18.09.2025
Oxunuş sayı: 6978
