Beynəlxalq birgə təlimlərdə Azərbaycan hərbi gücünü və mədəni zənginliyini nümayiş etdirdi- Ekspert
Azərbaycan, Qazaxıstan, Qətər, Özbəkistan, Pakistan və Türkiyə xüsusi təyinatlılarının iştirakı ilə keçirilən “Sonsuz qardaşlıq – IV” çoxmillətli birgə xüsusi təyinatlı qüvvələr təlimi ölkəmizin hərbi əməkdaşlıq sahəsində beynəlxalq əlaqələrinin inkişafını nümayiş etdirir. Təlim çərçivəsində yalnız hərbi hazırlıq səviyyəsinin artırılması deyil, həm də iştirakçı ölkələrin nümayəndələri arasında mədəni və humanitar əlaqələrin gücləndirilməsi məqsədilə tədbirlər təşkil olunub. Belə tədbirlərdən biri olaraq Azərbaycan Ordusunun Təlim və Tədris Mərkəzində “Azərbaycan musiqi çələngi” adlı konsert proqramı təqdim edilmiş, ölkəmizin zəngin mədəniyyəti və tarixi iştirakçılarla paylaşılıb. Bu, həm hərbi əməkdaşlıq, həm də ölkəmizin mədəniyyətinin beynəlxalq aləmdə təbliği baxımından xüsusi önəm daşıyır.
Mövzu barədə Crossmedia.az-a danışan hərbi ekspert Ədalət Verdiyev bildirib ki, “Sonsuz Qardaşlıq” təlimləri ilk dəfə 2022-ci ildə Türkiyədə, daha sonra Qazaxıstan və Azərbaycanda keçirilmişdir: "Son dəfə keçirilən dörd çoxmillətli birgə təlimlərdə Azərbaycan, Qazaxıstan, Qətər, Özbəkistan, Pakistan və Türkiyə xüsusi təyinatlıları iştirak edib. Təlimlərin əsas məqsədi dost və müttəfiq ölkələrin xüsusi təyinatlı hissə və bölmələri arasında qarşılıqlı təcrübə mübadiləsini təmin etmək, qərargahların fəaliyyətlərini uzlaşdırmaq və bacarıqları təkmilləşdirməkdir".
Ekspert vurğulayıb ki, intensiv ssenari üzrə davam edən təlimlərdə xüsusi təyinatlılar atəş imkanları, paraşütdən tullanma, snayper hazırlığı və yaşayış məntəqələrinin düşməndən təmizlənməsi üzrə müxtəlif tapşırıqları icra ediblər: "Belə təlimlər beynəlxalq təhlükəsizliyin möhkəmləndirilməsinə və regional sülhün qorunmasına mühüm töhfə verir, iştirakçı ölkələrin hərbi qulluqçularının təcrübə mübadiləsindən qarşılıqlı şəkildə bəhrələnməsinə və yeni silahlı mübarizə metodlarının mənimsənilməsinə imkan yaradır".
Mehriban Yariyeva
21:16 17.09.2025
Oxunuş sayı: 15851
