Azərbaycan və BƏƏ arasında hərtərəfli strateji tərəfdaşlıq əlaqələri möhkəmləndirilir- Rəy
Azərbaycan Respublikası ilə Birləşmiş Ərəb Əmirlikləri arasında Hərtərəfli Strateji Tərəfdaşlıq Əlaqələrinin möhkəmləndirilməsi istiqamətində mühüm addım atılıb. Ölkələr arasında əməkdaşlığın yeni mərhələsini əks etdirən “Azərbaycan Respublikası ilə Birləşmiş Ərəb Əmirlikləri arasında Hərtərəfli Strateji Tərəfdaşlıq Əlaqələri haqqında Birgə Bəyannamə” sənədi imzalanıb. Sənəd Azərbaycan Prezidenti İlham Əliyev və BƏƏ Prezidenti Şeyx Məhəmməd bin Zayed Al Nəhyanın iştirakı ilə, Azərbaycanın xarici işlər naziri Ceyhun Bayramov və BƏƏ-nin dövlət naziri Səid Əl Haceri tərəfindən mübadilə edilib.
Sənəd iki ölkə arasında siyasi, iqtisadi və strateji sahələrdə əməkdaşlığın daha da inkişaf etdirilməsinə zəmin yaradır.
Mövzu barədə Crossmedia.az- a danışan Milli Məclisin deputatı Vüqar Bayramov bildirib ki, Azərbaycan və Birləşmiş Ərəb Əmirliyi arasında münasibətlərin daha da dərinləşməsi müşahidə olunur: “Bir tərəfdən qarşılıqlı investisiya qoyuluşları, digər tərəfdən isə xarici ticarət dövriyyəsinin artırılması ilə bağlı həyata keçirilən tədbirlər praktiki olaraq iki ölkə arasında iqtisadi münasibətlərin genişlənməsinə gətirib çıxarır. Təbii ki, iqtisadi münasibətlərin genişləndirilməsi üçün kifayət qədər böyük potensial mövcuddur və bu potensialın reallaşması baxımından birgə müzakirələr və səfərlər xeyli əhəmiyyət kəsb edir. İmzalanmış sənədlər də bir daha təsdiq edir ki, ölkələr qarşılıqlı münasibətləri daha da dərinləşdirmək niyyətindədirlər. Burada həm neft sektorunda, həm qeyri-neft sahəsində əməkdaşlığın gücləndirilməsi nəzərdə tutulur. Birləşmiş Ərəb Əmirliyi Azərbaycan üçün qeyri-neft məhsullarının ixracı baxımından əsas bazarlardan birinə çevrilə bilər. Hazırda iki ölkə arasında ticarət dövriyyəsi yüz milyon dollara yaxındır, lakin bu dövriyyənin artırılması imkanları kifayət qədər böyükdür. Bu kontekstdə gözlənilir ki, BƏƏ Prezidentinin Azərbaycana səfəri iki ölkə arasında münasibətlərdə yeni səhifə açacaq”.
Mehriban Yariyeva
20:29 17.09.2025
Oxunuş sayı: 6191
