Azərbaycanın süni intellekt strategiyası irəliləyir- Deputat
Azərbaycanın rəqəmsal inkişaf sahəsində sürətli irəliləyişi və süni intellekt texnologiyalarına öncül yanaşması ölkədə innovasiyaların tətbiqini sürətləndirir. Bu kontekstdə, Rəqəmsal İnkişaf və Nəqliyyat Nazirliyi ilə beynəlxalq “Presight” şirkəti arasında Azərbaycan Respublikasının 2025–2028-ci illər üçün Süni İntellekt Strategiyasının icrası üzrə əməkdaşlığa dair Anlaşma Memorandumunun imzalanması mühüm addım kimi qiymətləndirilir. Həmçinin, Elm və Təhsil Nazirliyi ilə “Presight” şirkəti arasında təhsildə süni intellektin tətbiqinin genişləndirilməsinə yönəlmiş memorandum, ölkədə innovativ təhsil texnologiyalarının inkişafına dəstək verəcək. Bu əməkdaşlıqlar Azərbaycanın süni intellekt sahəsində strateji hədəflərinə çatmasında və texnoloji transformasiyanın sürətlənməsində əsas rol oynayacaq.
Bu barədə Crossmedia.az-a danışan Milli Məclisin deputatı, Ana Vətən Partiyasının sədr müavini Günay Ağamalı bildirib ki, Azərbaycanın gələcək inkişaf strategiyasının əsas istiqamətlərindən biri rəqəmsal transformasiya və süni intellekt texnologiyalarının tətbiqidir: "Bu baxımdan, 2025–2028-ci illər üçün qəbul olunmuş Süni İntellekt Strategiyası çərçivəsində atılan addımlar olduqca mühüm əhəmiyyət daşıyır. Azərbaycan süni intellektin inkişafına dair bu sahədə ABŞ və Çin kimi qabaqcıl dövlətlərlə sıx əməkdaşlıq edir və gələcək perspektivlərə zəmin yaradır. Rəqəmsal İnkişaf və Nəqliyyat Nazirliyi ilə Birləşmiş Ərəb Əmirliklərinin qabaqcıl texnoloji şirkəti “Presight” arasında imzalanmış Anlaşma Memorandumu, eləcə də Elm və Təhsil Nazirliyi ilə təhsildə süni intellektin tətbiqinə dair bağlanan sənəd ölkəmizin bu sahədə mövcud çağırışlara adekvat reaksiya verdiyini göstərir. Bu tip əməkdaşlıqlar süni intellektin iqtisadiyyatda, təhsil sistemində və digər sahələrdə səmərəliliyi artırmasına şərait yaradacaq. Xüsusilə, Birləşmiş Ərəb Əmirlikləri neft strategiyasını qeyri-neft sektorunun inkişafına transformasiya etməyi yüksək səviyyədə reallaşdıran dövlətdir və bu əməkdaşlıq hər iki tərəf üçün faydalıdır".
O, əlavə edib ki, xüsusilə təhsil sahəsində süni intellektin tətbiqi şagird və tələbələrin fərdi bacarıqlarının üzə çıxarılmasına, tədris prosesinin keyfiyyətinin yüksəldilməsinə, müəllimlərin işinin yüngülləşdirilməsinə və ən əsası, innovativ düşüncəli gənc nəslin yetişdirilməsinə mühüm töhfə verəcək: "Bu əməkdaşlıqlar bir daha göstərir ki, Cənab Prezident İlham Əliyevin rəhbərliyi ilə Azərbaycan yalnız regionda deyil, həm də beynəlxalq müstəvidə rəqəmsal transformasiyanın avanqard ölkələrindən birinə çevrilməkdədir. Süni intellekt texnologiyalarının tətbiqi Azərbaycanın qlobal rəqabət qabiliyyətini artıracaq, həmçinin “ağıllı iqtisadiyyat” və “ağıllı təhsil” konsepsiyalarının reallaşdırılmasına güclü dəstək olacaq”.
Mehriban Yariyeva
17:03 17.09.2025
Oxunuş sayı: 24194
