"Avropanın təhlükəsizliyi heç də üstün bir səviyyədə deyil" -Ekspert
ABŞ hazırda qlobal hərbi mövcudluğunu yenidən dəyərləndirir. ABŞ Müdafiə Nazirliyi (Pentaqon) rəhbərliyi ilə aparılan bu proses çərçivəsində ölkənin xaricdəki qüvvələrinin yerləşdirilməsinə baxılır. Məqsəd – dəyişən beynəlxalq vəziyyətə, xüsusilə də Hind-Sakit okean bölgəsində artan gərginliyə uyğunlaşmaq və xaricdəki xərcləri azaltmaqdır. Bu baxımdan Avropadakı qoşunların sayının 30 faiz azaldılması da gündəmdədir.
Bu barədə Crossmedia.az-a danışan hərbi ekspert Ədalət Verdiyev xatırladıb ki, ABŞ Prezidenti Donald Tramp hakimiyyətə gələndən sonra artıq Avropayla təhlükəsiz sahəsində xərclərini kifayət qədər azaldacağına dair bəyanatlar da səsləndirib: "Avropada ABŞ qoşunlarının sayının azaldılması Avropa təhlükəsizliyində də mənfi təsir edəcək. Dəfələrlə Avropa özünəməxsus silahlı qüvvələr yaratması məsələsini gündəmə gətirib, lakin ortaq bir məxrəcə gələ bilməyib, yəni qərar qəbul edilməyib".
Ekspertin sözlərinə görə, bu məsələni uzun müddətdir müzakirə olunmasına baxmayaraq, hələ də müsbət həllini tapmayıb: "Çünki Avropanın bir çox ölkələri İkinci Dünya müharibəsindən sonra hesab ediblər ki, artıq Dünya müharibələri olmayacaq və dünya artıq fərqli bir istiqamətdə inkişaf edəcək. Amma son illərdə, xüsusilə də Ukrayna müharibəsindən sonrakı vəziyyət onu göstərdi ki, Avropanın təhlükəsizliyi heç də üstün bir səviyyədə deyil. Buna görə də ABŞ anlayır ki, bəzi Avropa ölkələri hətta NATO-ya ödəyəcəkləri məhsulun iki faizlik miqdarını ödəmirlər. Ödəniş olmadığı təqdirdə isə əsas güc ABŞ-nin üzərinə düşür. ABŞ isə bu xərclərdən qurtulmaq üçün öz qoşunlarının sayını azaldır. Bununla da hərbi xərclərini öz təhlükəsizliyinə və yalnız onun maraqları çərçivəsində olan istiqamətlərə yönətməyə çalışır".
Fatimə Məmmədova
14:40 28.07.2025
Oxunuş sayı: 5495
