“Rusiya ilə Ukrayna arasında yaxın zamanda atəşkəs olmayacaq"- Ekspert
ABŞ Prezidenti Donald Tramp yenidən siyasi gündəmin ön sıralarına yüksələrkən, Rusiya-Ukrayna müharibəsi ilə bağlı verdiyi bəyanatlar dünya ictimaiyyətinin diqqətini cəlb edir. Trampın son açıqlamasında Ukrayna Prezidenti Volodimir Zelenski və Rusiya Prezidenti Vladimir Putinlə üçtərəfli görüşün keçirilməsinin mümkünlüyünü qeyd etməsi, uzun sürən müharibənin diplomatik həllinə ümidləri yenidən alovlandırıb. “Bu, baş verəcək. Amma artıq üç ay əvvəl baş verməli idi” deyən Trampın vasitəçilik təşəbbüsü beynəlxalq aləmdə müxtəlif reaksiyalar doğurur. Bəs görəsən, bu səylər real nəticə verəcəkmi? İllərdir davam edən Rusiya-Ukrayna münaqişəsinə diplomatik son qoymaq mümkündürmü?
Mövzu ilə bağlı politoloq Oqtay Qasımov Crossmedia.az-a açıqlama verib:
“Donald Tramp hakimiyyətə gələndən Rusiya-Ukrayna müharibəsini bitirəcəyini söyləmişdi. Bu istiqamətdə fəaliyyətini davam etdirsə də, ortaya qoyulan səylər öz nəticəsini vermir. ABŞ-nin istədiyindən fərqli olaraq, atəşkəs əldə olunmayıb. Hazırda üçtərəfli görüşlə bağlı səslənən fikirlər də arzu olaraq qalır. Düşünmürəm ki, yaxın bir ayda belə görüş olsun. Kremlin sözçüsü Dmitri Peskovun açıqlamasına da baxanda eyni niyyəti görürük. Tramp çox istəyərdi ki, üçtərəfli görüş keçirilsin, orada müəyyən nəticələr əldə olunsun. Ən azından atəşkəs əldə edilsin. Tramp da bunu özünün diplomatik qələbəsi kimi təqdim etsin. Amma hələlik bu nəticələrin real olduğunu düşünmürəm. Mümkün variantlardan biri sentyabrda Çində baş tutacaq toplantıdır. Tərəflərin bir-birinə zidd mövqeyinə baxdıqda yaxın zamanda atəşkəsin imzalanması real görünmür”.
Ayhan
16:46 26.07.2025
Oxunuş sayı: 1281
