Gül və konyak mübahisəsi fonunda rekord ticarət: Ermənistan Rusiyanın iqtisadi körpüsünə çevrilir
Rusiya ilə Ermənistan arasında gül və konyak ixracına tətbiq olunan son məhdudiyyətlər, iki ölkə arasındakı iqtisadi münasibətlərin zədələndiyini göstərsə də, ticarət dövriyyəsinin rekord səviyyəyə çatması reallığın daha mürəkkəb olduğunu ortaya qoyur.
Bu haqda Crossmedia.az-a açıqlama verən iqtisadçı Xalid Kərimli bildirib ki, görünən gərginliklərə baxmayaraq, Ermənistan-Rusiya ticarət əlaqələri əslində strateji xarakter daşıyır:
“2024-cü ildə ticarət dövriyyəsi 12 milyard dollara çatıb. Bu, əvvəlki illərlə müqayisədə 3-4 dəfə artım deməkdir. Bu artımda əsas faktor, sanksiyalardan yayınmaq üçün Ermənistandan istifadə olunmasıdır. Ermənilər Rusiyaya mal göndərərkən gömrük və bürokratik əngəllərlə üzləşmirlər. Bu da Ermənistanı Moskva üçün mühüm körpüyə çevirir.”
Xalid Kərimlinin sözlərinə görə, Rusiyanın gül və konyakla bağlı tətbiq etdiyi məhdudiyyətlər daha çox siyasi xarakter daşıyır və qarşı tərəfə “siqnal” göndərmək məqsədi güdür:
“Rusiya bu cür addımlarla Ermənistana xəbərdarlıq edir, lakin əsas ticarət istiqamətləri dəyişmir. Statistikaya baxsaq, gül ixracı artıb. Bu ilin ilk 6 ayında 52 milyon ədəd gül ixrac olunub, bunun 93 faizi Rusiya bazarına gedib. Əgər Rusiya Ermənistan üçün təhlükəli bazar olsaydı, bu qədər məhsul oraya göndərilməzdi.”
Ekspert əlavə edib ki, Ermənistandan Rusiyaya konyak ixracı da yüksək səviyyədədir və bu sahədə illik dövriyyə 200 milyon dolları keçir:
“Konyakın adının dəyişdirilməsi ilə bağlı qərarlar da daha çox simvolik xarakter daşıyır. Əvvəllər də bu cür dəyişikliklər olub, amma nəticədə ticarət davam edib".
Mehriban Yariyeva
18:31 17.07.2025
Oxunuş sayı: 10899
