Səhiyyə sistemlərinin iqlimə uyğunlaşması London İqlim Fəaliyyət həftəsində müzakirə edilib
Azərbaycan Britaniya Peşəkarları Assosiasiyası (AABP) və Azərbaycan Səhiyyə Nazirliyi London İqlim Fəaliyyəti Həftəsində (London Climate Action Week) iştirak edib.
London İqlim Fəaliyyəti Həftəsi (LCAW) yüzlərlə təşkilatın, icmanın və fərdin öz tədbirlərini keçirdiyi geniş və canlı iqlim fokuslu fəaliyyətlər proqramını təqdim edən platformadır. Bu il 7-ci ildir ki, Londonda keçirilən bu tədbir, Avropanın ən böyük şəhər miqyaslı iqlim platforması olub və bu il 45,000 iştirakçı qatılıb, 700 tədbir keçirilib. Onlardan biri də Azərbaycan Britaniya Peşəkarları Assosiasoyasının hazırladığı tədbir olub.
Crossmedia.az xəbər verir ki, tərəfdaşlıq çərçivəsində keçirilən “İqlim Dəyişikliyinə Uyğunlaşan Səhiyyə Sistemləri: İrəliyə Doğru Yol” adlı beynəlxalq onlayn tədbir, səhiyyə sistemlərinin iqlim dəyişikliklərinə uyğunlaşması və davamlılığa keçid mövzusunu diqqət mərkəzinə çəkib.
Tədbirdə səhiyyə və iqlim sahəsində tanınmış mütəxəssislər – Assosiasiyanın təsisçisi və cərrahiyyə mütəxəssisi Dr. İlhamə Cəfərli, Səhiyyə Nazirliyinin Səhiyyə siyasəti şöbəsinin müdiri Ramik Quliyev, səhiyyə meneceri və AABP-nin İdarə Heyətinin üzvü cənab Fəqan Həsənzadə, həmçinin London Universitetində (UCL) Onkologiya elmləri oxuyan, AABP-nin İdarə Heyətinin üzvü Mədinə Əmiraslanova iştirak və çıxış edib.
Onlar səhiyyə sistemlərinin iqlim risklərinə adaptasiyası, COP30 yolunda qarşıya qoyulan məqsədlər və sektorlararası əməkdaşlıq imkanları barədə fikir və tövsiyələrini bölüşüblər.
Konfrans çərçivəsində “İcma Davamlılığı Strategiyaları” və “Səhiyyə siyasətində innovativ yanaşmalar” adlı sessiyalar keçirilib.
Bu təşəbbüs AABP-nin qlobal elmi dialoqu və səhiyyənin iqlim siyasətlərinə inteqrasiyasına töhfəsini nümayiş etdirərək, Azərbaycan səhiyyə sektorunun beynəlxalq platformalarda aktiv iştirakını ön plana çıxarır.
Nəzrin Salmanova
23:56 26.06.2025
Oxunuş sayı: 28801
